"აბსურდული და სასაცილო" - მეუფე დიმიტრი ამბობს, რომ პატრიარქს ქამარზე სეიფის გასაღები არ ჰკიდია, რომელშიც ანდერძია

საზოგადოება - 18:32, 25 Oct, 2017

4047

ბათუმისა და ლაზეთის მიტროპოლიტმა, საქართველოს საპატრიარქოს საინფორმაციო სამსახურის ხელმძღვანელმა მეუფე დიმიტრიმ, მსჯავრდებული მამა გიორგი მამალაძის მონახულების შემდეგ პატრიარქის ანდერძთან დაკავშირებით ბოლო დროს მედიაში გავრცელებულ ინფორმაციებს უპასუხა.

მისი თქმით, ინფორმაცია აბსურდული და სასაცილოა. მეუფე დიმიტრი აცხადებს, რომ არ არსებობს არანაირი ქამარი და გასაღები, რომელზე წვდომაც მხოლოდ სოსო ოხანაშვილს აქვს.

მაღალმა იერარქმა განმარტა, რომ ანდერძი უბრალოდ პატრიარქის ერთი ხმაა, რეალურად კი გადაწყვეტილებას მოსაყდრის მიერ მოწვეული კრება იღებს.

„ბოლოს ვნახე ტარას შავშიშვილის განცხადება და გამაოგნა, რომ ვითომ პატრიარქს ქამარი აქვს და რომ ამ ქამარზე სეიფის გასაღები ჰკიდია, რომელზეც ხელი მხოლოდ სოსო ოხანაშვილს მიუწვდება. ამ სეიფში კი ანდერძია. ეს ყველაფერი უცნაურია, ასეთი რამ მე ზღაპრებში წამიკითხავს, ეს იმდენად სასაცილო რამეა და მოგონილი თემაა. პატრიარქი ტოვებს ანდერძს, ხოლო ეს არის მისი ერთი ხმა. ღმერთმა დიდხანს აცოცხლოს ჩვენი პატრიარქი, მაგრამ გარდაცვალების შემთხვევაში, როდესაც ხდება მოსაყდრის არჩევა, ეს მოსაყდრე იწვევს კრებას პატრიარქის ასარჩევად და მიწას უნდა მიაბაროს გარდაცვლილი. ეს არის სულ მისი ფუნქცია და ეს არის თუ არა სოსო ოხანაშვილთან შეთანხმებული, ამაზე ვერაფერს გეტყვით“, - აღნიშნა მეუფე დიმიტრიმ.