საქართველოს ნაკრების გამორჩეული ფეხბურთელი და ნიდერლანდების ქალაქ არნემის "ვიტესის" კაპიტანი გურამ კაშია ერთ-ერთ მატჩზე ლგბტ დროშის სამკლაურით წარსდგა. ამ ნაბიჯით ის შეუერთდა Stonewall-ის თანასწორობის კამპანიას, რომელიც ლგბტ ადამიანების უფლებების დაცვას ეძღვნება. ფეხბურთელის ამ ქმედებას საქართველოში არაერთგვაროვანი რეაქცია მოჰყვა. ადამიანების გარკვეულმა ჯგუფმა კაშია ქართული ტრადიციების შეურაცხყოფაში დაადანაშაულა და მისი „ეროვნული ნაკრებიდან მოკვეთა“ მოითხოვა. ამ მხრივ განსაკუთრებული „ასავალ-დასავალის“ ჟურნალისტი გიორგი გიგაური გამოირჩეოდა.

კაშიას ქმედება დადებითად შეაფასა საქართველოს ფეხბურთის ფედერაციის ყოფილმა ხელმძღვანელმა ზვიად სიჭინავამ.

„კაშიამ დააფიქსირა ის, რომ ყველა ადამიანი, განურჩევლად მისი სექსუალური შეხედულებისა, არის ჩვენი საზოგადოების ჩვეულებრივი წევრი და მათი განსხვავება რაიმე ნიშნით, მიუღებელია. გურამ, შენ, პირადად ჩემთვის იყავი და ყოველთვის იქნები ქართული ფეხბურთის ნაწილი. შენ ბევრჯერ დაამტკიცე, რომ პატივია საქართველოს დროშის ქვეშ თამაში და ვამაყობ იმით, რომ შენთან ერთად ბევრი წელი ვიმუშავე“- ნათქვამია ზვიად სიჭინავას მიმართვაში.

გურამ კაშიას გაბედულ ნაბიჯს მიესალმა ლგბტ თემის უფლებებზე მომუშავე არასამთავრობო ორგანიზაცია "თანასწორობის მოძრაობაც" :

"მსგავსი ჟესტები მნიშვნელოვანია ფეხბურთის მრავალრიცხოვანი გულშემატკივრის დასაფიქრებლად და კიდევ უფრო მნიშვნელოვანია საქართველოში, სადაც ჰომოფობიური განწყობები განსაკუთრებით მძლავრია"- ნათქვამია "თანასწორობის მოძრაობის" განცხადებაში.

მის წინააღმდეგ აგორებულ ნეგატიურ ტალღას გურამ კაშია უცხოურ მედიასთან გამოეხმაურა. მისი თქმით ის ადამიანის თავისუფლების მხარდამჭერი და ძალადობის წინააღმდეგია, თავის ქმედებას არ ნანობს და მასზე პასუხისმგებლობას იღებს:

„მე ყოველთვის მხარს ვუჭერდი ადამიანის თავისუფლებას და ძალადობის წინააღმდეგი ვარ. არ აქვს მნიშვნელობა, ადამიანი ვინ არის და რას აკეთებს, თუ ის სხვას არაფერს უშავებს , შეუძლია იყოს ისეთი, როგორიც უნდა. ესაა ჩემი ხედვა და ნიდერლანდებშიც ასეა. რთული ასახსნელია, მაგრამ ჩემს ქვეყანაში ზოგიერთი ადამიანისთვის ეს მიუღებელია. რამდენიმე ადამიანმა ჩემს Facebook-გვერდზე აზრი გამოხატა, ისინი იმედგაცრუებულნი იყვნენ ჩემს გამო. ამას დიდ ყურადღებას არ ვაქცევ, არ ვნანობ რაც გავაკეთე, ეს ჩემი პირადი პასუხისმგებლობა იყო.“- განაცხადა გურამ კაშიამ.

არნემის „ვიტესის“ ქართველმა კაპიტანმა კომენტარი მისი საქართველოს ნაკრებიდან გაშვების მოთხოვნასთან დაკავშირებითაც გააკეთა და განაცხადა , რომ მას მოქალაქეობას და ეროვნულ ნაკრებს ვერავინ წაართმევს:

„არავის შეუძლია ჩემთვის მოქალაქეობის და ეროვნული ნაკრების წართმევა, თუნდაც ათასობით ადამიანი იყოს ჩემს წინააღმდეგ. თუ ჩემი ეროვნული ნაკრები გამომიძახებს, მე აუცილებლად წავალ სათამაშოდ“- განაცხადა გურამ კაშიამ.