"გატაცება ცოლმა შეგვიკვეთა"- რა დეტალები ხდება ცნობილი "გორგიას" მეპატრონის გატაცების მცდელობასთან დაკავშირებით

საზოგადოება - 18:44, 17 Oct, 2017

8558

კომპანია „გორგიას“ მეპატრონის გარშემო ატეხილი სკანდალი გრძელდება. გაზეთი “კვირის პალიტრა” გია გორგოშაძის გატაცების მცდელობაში ბრალდებულების მიერ მიცემულ ჩვენებასთან დაკავშირებით ინფორმაციას აქვეყნებს:

„ჩვენთვის კულუარულად გახდა ცნობილი, რომ ვიდეომასალაში, სადაც ბრალდებულები გატაცების გეგმას ამუშავებენ, ახსენებენ სახელებს: ნინო და ლალი… ისიც შევიტყვეთ, რომ გამოძიება მუშაობდა ანგარიშსწორების ვერსიაზეც, რომლის მიხედვითაც, ბიზნესმენის გატაცება ნინო დარსალიამ შეუკვეთა და საქმეში ჩართო მეგობარი ქალი ლალი ე. ბრალდებულები დუმილის უფლებას იყენებენ. თუმცა, როგორც „კვირის პალიტრისთვის“ გახდა ცნობილი, ერთ-ერთმა ბრალდებულმა დაკავებისთანავე პოლიციას ჩვენება მისცა და უკვე მას შემდეგ, რაც ადვოკატი დაენიშნა, გამოიყენა დუმილის უფლება. გამოცემის ინფორმაციითვე, ბრალდებულმა ჩვენებაში მიუთითა, რომ ფულის გამოძალვის მიზნით, მათ ბიზნესმენის გატაცება შეუკვეთეს. მისი ჩვენებიდან ისიც გაირკვა, რომ ოთხეული შემკვეთის „გადაგდებას“ – მხოლოდ 500 000-ის მიცემას და ქვეყნიდან გაქცევას აპირებდა.“- წერს გამოცემა.

„კვირის პალიტრა“ ჩვენებიდან ამონარიდსაც აქვეყნებს.

„გატაცება ცოლმა შეგვიკვეთა, ფული უნდოდა. გვითხრა, რომ გორგოშაძემ ჩემი ფულებით დაიწყო ბიზნესი და მერე გადამაგდო, ვუჩივლე და საქმე მიდისო.”

შეგახსენებთ სპეცოპერაცია წყნეთის გზატკეცილზე 12 ოქტომბრის ღამეს ჩატარდა. სამართალდამცველების ინფორმაციით აყვანილი იქნა დანაშაულებრივი ჯგუფი: ვასილ ვასილიადი, თამაზ მენთეშაშვილი, გურამ დგებუაძე და დავით ფოცხიშვილი, რომლებიც სამშენებლო ჰიპერმარკეტების ქსელ „გორგიას” მფლობელის, გია გორგოშაძის გატაცებას გეგმავდნენ. სამართალდამცველებმა იმავე ღამით, პარალელურად ბიზნესმენის ყოფილი მეუღლის, ნინო დარსალიას ბინა გაჩხრიკეს, საიდანაც კომპიუტერი და მობილური ტელეფონები ამოიღეს. გამტაცებლებს, გამოსასყიდის სახით, ბიზნესმენისგან 5 მილიონი დოლარი უნდა მოეთხოვათ.