ბათუმში, მოსახლეობის ნაწილი შშმ ბავშვებისთვის განკუთვნილი ატრაქციონების აღებას ითხოვს

საზოგადოება - 16:28, 21 Sep, 2017

1660

ბათუმის მერიამ შეზღუდული შესაძლებლობების მქონე ბავშვებისთვის ატრაქციონების მონტაჟი დაიწყო. საქანელები 6 ლოკაციაზე განთავსდება. ესენია: ბაქოს ქუჩა, აფხაზეთის 5 ნომერი, ფრდიდონ ხალვაძის 328 ნომერი. ჯავახიშვილის ქუჩის ბოლო, ლეონიძისა და ტაბიძის ქუჩების, ასევე კობალაძისა და ინასარიძის ქუჩების კვეთაში.
ატრაქციონებზე დატანილია სპციალური ნიშანი. მიუხედავად ამისა შეზღუდული შესაძლებლობების მქონე ბავშვთა ატრაქციონების არამიზნობრივად გამოყენების ფაქტები მაინც დაფიქსირდა. მერიაში აცხადებენ, რომ რამდენიმე დღის წინ აღნიშნული ატრაქციონების აღებასთან დაკავშირებით უწყებაში მოთხოვნაც შევიდა. მშობლების ნაწილის მხრიდან გაურკვეველი მოტივით ანალოგიური ატრაქციონების დადგმას წინააღმდეგობა მოჰყვა და მათ ფრიდონ ხალვაშისა და ინასარიძის ქუჩებიდან ადაპტირებული ატრაქციონები თვითნებურად აიღეს. ისინი ამბობენ, რომ ატრაქციონებზე მათი ბავშვები სხდებიან და ზიანდებიან.

„მსგავსი ტიპის მოთხოვნა და დამოკიდებულება დისკრიმინაციულია შშმ ბავშვების მიმართ. ბათუმის მერია მოუწოდებს მშობლებს, განსაკუთრებული ყურადღება მიაქციონ შვილებს ატრაქციონებით სარგებლობისას და შეძლებისდაგვარად უზრუნველყონ ატრაქციონების მიზნობრივად გამოყენება“- აცხადებენ ბათუმის მერიაში. უწყება შშმ პირთა უფლებების დამცველ ორგანიზაციებთან საინფორმაციო კამპანიის ჩატარებას გეგმავს.