ექსკლუზივი: რას ამბობს სტიქაროსანი, რომლის ფოტოებსაც პროკურატურა დეკანოზის წინააღმდეგ იყენებდა

საზოგადოება - 14:36, 21 Sep, 2017

11726

ე.წ. ციანიდის საქმე - სკანდალური საქმის ახალი დეტალები დღეს გახდა ცნობილი. „ტვ პირველმა“ ექსკლუზიურად მოიპოვა მსჯავრდებული დეკანოზ გიორგი მამალაძის დასკვნითი სიტყვა, სადაც დეკანოზი საუბრობს იმ ფაქტზე, რომ მასზე გამოძიების მხრიდან ფსიქოლოგიური ზეწოლა ხორციელდებოდა და მას გარკვეული ფოტომასალით აშანტაჟებდნენ. ცნობილი ხდება, რომ ერთ-ერთ ფოტოზე ასახულია მოდელი კობა ფარტენაძე, რომელსაც 2015 წელს მიტროპოლიტ დიმიტრი შიოლაშვილის ეპარქიაში მისი პროფესიის გამო სტიქარი გახადეს.

„ნიუპოსტი“ კობა ფარტენაძეს დაუკავშირდა, ჩვენთან საუბარში ის ადასტურებს მამა გიორგი მამალაძის მიერ სასამართლოზე გაკეთებულ განცხადებას. ფარტენაძე ამბობს, რომ მისთვის სამართალდამცავი უწყებიდან არავის მიუმართავს და არც ის იცოდა, რომ მისი ფოტოების გამო სასამართლო სხდომა დაიხურა.

ფარტენაძე ჩვენთან საუბრისას აცხადებს, რომ მას პრობლემა ფოტოებისა და პროფესიის გამო დეკანოზ ანდრია თურმანიძესთან შეექმნა, რომელიც მის ფოტოებს როგორც დეკანოზ გიორგი მამალაძეს, ასევე მის ახლობლებსაც გადაუგზავნა.

„ნამდვილად ჩემზეა საუბარი, რადგან, ვისაც მოდელობის გამო პრობლემა შეექმნა ვიყავი მე და თავიდანვე იყო გახმაურებული ფაქტი, როდესაც დეკანოზი ანდრია თურმანიძე არამარტო გიორგი მამალაძეს, არამედ ყველას უგზავნიდა ჩემს ფოტოებს. მიუხედავად იმისა, რომ ეს ფოტოები გადაუგზავნა, მასთან პრობლემა და კონფლიქტი არ შემქმნია. შემდეგ მასთან სტიქარს აღარ ვიცვამდი.“, - აღნიშნავს ფარტენაძე.

ფარტენაძის განცხადებით, მსჯავრდებულმა დეკანოზმა, ფოტოების ნახვის შემდეგ მიიღო გადაწყვეტილება, რომ მას წმინდა ბარბარეს სახელობის ეკლესიაში სტიქარი არ ჩაეცვა:

„მამა გიორგიმ დააფიქსირა თავისი აზრი, რომ ჩემთვის სტიქარის ჩაცმისგან თავს შეიკავებდა წმინდა ბარბარეს სახელობის ტაძარში, თავად ვთქვი ამაზე უარი, მაგრამ ვფიქრობ, რომ ეს იყო არასწორი გადაწყვეტილება“, - აცხადებს კობა ფარტენაძე.

იგი ასევე იხსენებს შეხვედრას მიტროპოლიტ დიმიტრი შიოლაშვილთან, რომელმაც განუცხადა, რომ მოდელობა და სტიქარის ტარება ერთმანეთისთვის შეუთავსებელია:

,,მე შევხვდი მიტროპოლიტს, დიმიტრი შიოლაშვილს, რომელმაც მითხრა, რომ მოდელობა და სტიქაროსნობა შეუთავსებელია, ამ ეპარქიაში სტიქარს ვერ ჩავიცვამდი. თუმცა, მე მაინც მაცვია სტიქარი, ოღონდ უკვე თბილისში“, - დასძენს ფარტენაძე.

როგორც ჩვენთან საუბრისას ფარტენაძე აღნიშნავს, მას პროკურატურიდან თუ დაცვის მხრიდან არავინ დაკავშირებია და შესაბამისად, არც დაკითხვაზე ყოფილა:

„მე არავინ დამკავშირებია პროკურატურიდან, არცერთი მხრიდან არავინ დამკავშირებია, შესაბამისად არც დაკიტხვაზე ვყოფილვა“, - დასძენს იგი.