საქართველოს საკალათბურთო ნაკრების ორმა უძლიერესმა წევრმა ზაზა ფაჩულიამ და ვიქტორ სანიკიძემ სანაკრებო კარიერა დაასრულეს. ამის შესახებ რამდენიმე დღის წინ თავად სპორტსმენებმა განაცხადეს.

ჟურნალ „სარკესთან“ საუბრისას ვიქტორ სანიკიძე აცხადებს, რომ კარიერის დასრულებას გიორგი ცინცაძეც აპირებს, თუმცა მას ამის შესახებ ჯერჯერობით ოფიციალური განცხადება არ გაუკეთებია.

ჟურნალისტის კითხვაზე, როგორ აისახება ძველი თაობის წასვლა ნაკრებიდან, სანიკიძე აცხადებს, რომ ახალ თაობას მათ გარეშე მძიმე ტვირთის ზიდვა ძალიან გაუჭირდება:

„სამწუხაროდ აისახება, ჩვენთან ერთად გიორგი ცინცაძეც აპირებს კარიერის დასრულებას, თუმცა ჯერ ოფიციალურად არ დაუდასტურებია. ეს გარდაუვალი პროცესი იყო. უბრალოდ დასანანია. გვინდოდა, ჩვენს თაობას ახალ თაობასთან გვეთამაშა. ჩვენი არყოფნით ახალგაზრდებს უდიდესი ტვირთი დააწვებათ და ძალიან გაუჭირდებათ. კარგი იქნებოდა 1-2 წელი ერთად გვეთამაშა, გამოცდილებას შეიძენდნენ და უფრო გაუადვილდებოდათ ადაპტაცია“, - აცხადებს კალათბურთელი.

საქართველოს ნაკრები წელს „ევრობასკეტ 2017“-ზე თამაშობდა, თუმცა ფლეიოფში ვერ გავიდა. ლიტვასთან თამაშისას გიორგი ცინცაძემ ფეხის სერიოზული ტრავმა მიიღო. საქართველოს ნაკრების შინ დაბრუნების შემდეგ ზაზა ფაჩულიამ გაავრცელა ინფორმაცია იმის შესახებ, რომ მან სანაკრებო კარიერა დაასრულა. ასევე, გასულ კვირას გახდა ცნობილი ვიქტორ სანიკიძის კარიერის დასრულების შესახებაც.