როგორც "ნიუპოსტს" უყვებიან, მამედოვი რუსეთში რამდენიმე მკვლელობისთვის იძებნებოდა. ერთ-ერთი ვერსიით, გუშინ მომხდარი კრიმინალური ფაქტი თურქეთში ერთი წლის წინ, კრიმინალური ავტორიტეტის მკვლელობის საქმის გაგრძელებაა.
უფრო კონკრეტულად, გასულ წელს თურქეთში აზერბაიჯანელი კრიმინალური ავტორიტეტი, როვშენ ლენ კარანსკი მოკლეს. მაშინვე ითქვა, რომ კარანსკი ასევე აზერბაიჯანელმა კანონიერმა ქურდმა, მეტსახელად "გულმა" მოიშორა.
ელჩინ მამედოვის ახლობლები კი პირად საუბრებში აღიარებენ, რომ გუშინ ჩაცხრილული მამედოვი "გულის" ნდობით აღჭურვილი პირი იყო.
ცნობისთვის, ელჩინ მამედოვსა და ჯერ-ჯერობით დაუდგენელ პირს შორის კამათი ორთაჭალაში მდებარე რესტორან "პურის სახლში" გუშინ დაიწყო. რაც ქუჩაში, ორმხრივ სროლასა და საბოლოოდ 42 წლის მამაკაცის ჩაცხრილვით დასრულდა.
"ნიუპოსტის" ინფორმაციით, ელჩინ მამედოვს მრავლობითი ჭრილობები აღენიშნება, ეს უკანასკნელი საკონტროლო გასროლით მოკლეს. მამაკაცს ტყვია თავის არეში მიბჯენით აქვს მოხვედრილი.
ადგილზე გუშინ მთელი ღამის განმავლობაში მუშაობდნენ ექსპერტ-კრიმინალისტები. პოლიციაში დაიკითხა ყველა ის პირი ვინც უშუალოდ შეესწრო ფაქტს.
შსს-მ გამოძიება სისხლის სამართლის კოდექსის 108-ე და 236-ე მუხლებით დაიწყო, რაც განზრახ მკვლელობას და ცეცხლსასროლი იარაღის უკანონო შეძენა-შენახვა-ტარებას გულისხმობს.
მასალის გამოყენების პირობები