გოგი გვახარია ახალი საავტორო გადაცემით „ანარეკლები“ 12 სექტემბერს ბრუნდება

საზოგადოება - 14:53, 09 Sep, 2017

1476

12 სექტემბერს იწყება გიორგი გვახარიას ახალი საავტორო პროგრამა „ანარეკლები“, რომელიც რადიო თავისუფლებისა და აჭარის საზოგადოებრივი მაუწყებლის ერთობლივი პროექტია. ინფორმაციას ამის შესახებ „რადიო თავისუფლება“ ავრცელებს:

როგორც გადაცემის შესახებ გავრცელებულ ინფორმაციაშია ნათქვამი:

„ანარეკლები“ ისტორიის სახეებით შეეცდება წარსულის გააზრებას. ისტორია ხომ კინოს ჰგავს - უსასრულო და ზოგჯერ ძნელად ასახსნელი ნიშან-ხატებით...

პროგრამაში ვიმსჯელებთ წარსულის იმ სახეებზე, იმ ანარეკლებზე, რომლებიც დღევანდელ ჩვენს ცხოვრებას განსაზღვრავენ - ხელს გვიშლიან განვითარებაში, ანდა პირიქით, გვეხმარებიან წინააღმდეგობების გადალახვაში. ვისაუბრებთ სხვა ხალხის, სხვა კულტურების გამოცდილებაზეც - „ანარეკლები“ ხომ ზოგჯერ არა მარტო განგვასხვავებენ, არამედ გვამსგავსებენ ერთმანეთს.

„ანარეკლები“ - ისტორიისა და დღევანდელობის სახეების - მათ შორის მხატვრული სახეების - გააზრების ცდაა, სიცოცხლეში და იმ კინოში, რომელმაც უახლოესი წარსული შემოგვინახა.“

გადაცემა აჭარის საზოგადოებრივი მაუწყებლის ეთერით გადაიცემა სამშაბათობით, 22 საათზე, და განმეორდება შაბათობით 24 საათზე. გადაცემის ყურება შეგიძლიათ ასევე რადიო თავისუფლების ვებსაიტზე და სოციალური ქსელებით.