საქართველოს ეროვნული საკალათბურთო ნაკრების კაპიტანმა ზაზა ფაჩულიამ გუშინ გამართული საქართველო-იტალიის მატჩის შემდეგ განაცხადა, რომ ეროვნულ გუნდში კარიერა დაასრულა.

ფაჩულიას თქმით ევრობასკეტი 2017 მისთვის ბოლო ტურნირი იყო საერთაშორისო არენაზე:

„ეს ჩემი გამოსათხოვარი ტურნირი იყო. ნაკრებში შესანიშნავი 17 წელი გავატარე. მახსოვს კარგი მომენტები ამ გუნდთან ერთად. ამ წუთას ძალიან იმედგაცრუებული ვარ, რადგან შეგვეძლო პლეიოფში გასვლა, მაგრამ ამაყი ვარ იმით, რასაც ახალგაზრდა თაობას ვუტოვებ“, - ამბობს ზაზა ფაჩულია.

შეგახსენებთ, რომ საქართველოს ნაკრები ევრობასკეტი 2017 წლის ფლეიოფში ვერ გავიდა. საქართველომ გუშინ იტალიის ნაკრებთან 2 ქულიანი სხვაობით წააგო. მცირედი შანსი რჩებოდა ფლეიოფში გადასვლის თუმცა, ამისათვის ისრაელს უკრაინა უნდა დაემარცხებინა, მაგრამ უკრაინამ გამარჯვება დიდი სხვაობით მოიპოვა.