შავი ზღვის ფოლკლორის საერთაშორისო ფესტივალის ორგანიზატორები Black Sea Arena-ზე გალა კონცერტის დეტალებზე ისაუბრებენ

კულტურა - 10:23, 01 Sep, 2017

1771

ხვალ, 1 სექტემბერს, 14:00 საათზე Black Sea Arena-ზე შავი ზღვის ფოლკლორის საერთაშორისო ფესტივალის ორგანიზატორები პრესკონფერენციას გამართავენ. ფოლკლორის სახელმწიფო ცენტრის დირექტორი გიორგი დონაძე, „ბლექ სი არენა ჯორჯიას” დირექტორი ანა კავლელიშვილი, გურიაში სახელმწიფო რწმუნებული-გუბერნატორი მერაბ ჭანუყვაძე და ესპანელი ფოლკლორისტი პოლო ვალეხო ფესტივალის მნიშვნელობაზე, მონაწილე ქვეყნებსა და ფოლკლორულ ჯგუფებზე, გალა კონცერტის დეტალებსა და მოსალოდნელ შედეგებზე ისაუბრებენ.

შავი ზღვის ფოლკლორის საერთაშორისო ფესტივალი ტრადიციულად შავიზღვისპირეთში ტარდება და წელს, გურიასთან ერთად აჭარაც მასპინძლობს. ფესტივალმა სტარტი გუშინ, ბათუმის საზაფხულო თეატრში აიღო.

ფესტივალის ფარგლებში კონცერტები ასევე გაგრძელდება დღეს, 1 სექტემბერს, 17:00 საათზე ურეკის კულტურის სახლში. კონცერტში, რომელიც ყველა დაინტერესებული პირისთვის უფასოა, მონაწილეობენ ქართული ფოლკლორული ჯგუფები: შემოქმედი, რეხეული, ამაღლება, ადილეი, ძირიანი, შილდა, ასევე ფესტივალში მონაწილე შემსრულებლები უკრაინიდან, სომხეთიდან, პოლონეთიდან, იტალიიდან და თურქეთიდან.

ამავე დღეს, დაგეგმილია რეპეტიციები Black Sea Arena-ს სცენაზე, სადაც ყველა მონაწილე საკუთარ ნომერს შეასრულებს ხმის და კონცერტის რეჟისორთან ერთად. ფესტივალი 2 სექტემბერს, გრანდიოზული გალა კონცერტით Black Sea Arena-ზე დასრულდება. მნიშვნელოვანია, რომ გალა კონცერტზე დასასწრები ბილეთის ღირებულება 5 ლარიდან იწყება.

ცეცხლოვან შოუს ესპანელები გვპირდებიან - ფლამენკოს შემსრულებელი ჯგუფი “La Moneta & Flamenco” სპეციალური სტუმრის სტატუსით ფესტივალის გალა კონცერტზე, 2 სექტემბერს წარსდგება მაყურებლის წინაშე. მათ შეუერთდებიან საუკეთესო ფოლკლორული გუნდები პოლონეთიდან, უკრაინიდან, სომხეთიდან, თურქეთიდან და იტალიიდან. საქართველოს კი ანსამბლები „რუსთავი“ და „ბასიანი“ წარმოადგენენ.

წელს ფესტივალი სამი დღის განმავლობაში გრძელდება და 7 ქვეყანას მასპინძლობს. მაყურებლის წინაშე ესპანეთის, იტალიის, პოლონეთის, უკრაინის, სომხეთის, თურქეთისა და საქართველოს ფოლკლორული ანსამბლები წარსდგებიან და თავიანთი ქვეყნის უნიკალურ ხალხურ ტრადიციებს, სიმღერითა და ცეკვით წარმოადგენენ. როგორც ორგანიზატორები აღნიშნავენ, ფესტივალს დიპლომატიური კორპუსი ოფიციალურ მხარდაჭერას უცხადებს და მის წარმატებულად ჩატარებაში დიდი წვლილი შეაქვს იტალიის, თურქეთი, პოლონეთისა და უკრაინის საელჩოებს. მათივე ძალისხმევითა და მხარდაჭერით გაიზარდა მონაწილე ფოლკლორული ანსამბლების რაოდენობაც.

ფესტივალი, რომლის ავტორი და ორგანიზატორი ფოლკლორის სახელმწიფო ცენტრია, Black Sea Arena-ს, ,,Check in Georgia"-ს, კულტურის სამინისტროსა და ოზურგეთის მუნიციპალიტეტის მხარდაჭერით იმართება.