"სულ მაგინებდა, მოკვლით მემუქრებოდა"- დაჭრის ფაქტზე დაკავებულის ყოფილი ცოლი

საზოგადოება - 18:30, 31 Aug, 2017

2587

გუშინ საღამოს, ოზურგეთში მალაზონიას ქუჩაზე დაჭრის ფაქტი მოხდა. ორი ქალბატონისა და 5 თვის ბავშვის დაჭრისთვის 52 წლის დიტო დონაძეა დაკავებული.

როგორც ერთ-ერთი დაშავებული ქალბატონი გვიყვება, დონაძემ სანადირო თოფით მანქანიდან იმ დროს ისროლა, როცა მეზობელთან იყო სტუმრად.

დაკავებულის ყოფილი სიდედრი, ნინო შეყილაძე კი გვიყვება, რომ მას ყოფილმა სიძემ მანქანიდან სანადირო თოფით ესროლა:

"ვიყავი მეზობელთან გადასული, სიძემ დამირეკა ტელეფონზე, იყო მთვრალი, მითხრა დამალაპარაკე ინდირაო (ჩემი ქალიშვილი, მისი ყოფილი მეუღლე), ვუთხარი არ ვარ სახლში-მეთქი და გავუთიშე ტელეფონი. როცა გავთიშე ხუთი წუთი არ იყო გასული, რომ დარეკა. კიდევ გავუთიშე, შემდეგ რეკავდა და რეკავდა. არ მიპასუხია საერთოდ. მერე ჩემი გოგოსთვის დაურეკავს - ამეღამ ნახე რა გიქნა, მოვალ და მოგკლავო. მე ეს არ ვიცოდი, წამოვედი სახლში. მეოთხე შვილიშვილი მყავს (სამი შვილიშვილი ნინო შეყილაძეს ინდირა კოსტავასაგან და დიტო დონაძისაგან ჰყავს-რედ), ხუთი თვის. მეწვინა ის, აგერ სახლის წინ, მაგიდაზე, ტიროდა ძლივს გავაჩერე, მეზობლის ქალი, მზია შუბლაძე იყო აქ. ვლაპარაკობდით და უცებ ჭიშკრის წინ გაჩერდა მანქანა, ჩემი ყოფილი სიძის და შევხედე, მთვრალი რომ იყო. ვიფიქრე, ბავშვები არ წაიყვანოს- მეთქი. სამივე შვილიშვილი ჩვენთანაა. ავდექი ზედ, ეს ბავშვი უნდა ამეყვანა ხელში, შევსულიყავი ჩემს გოგოსთან და მეთქვა, რომ მოსულია და ბავშვები არ გავატანოთ-მეთქი. ამის გაფიქრება და ვერც თქმა ვერ მოვასწარი, ვერც ამ პატარა ბავშვის ხელში აყვანა, რომ გასროლა მანქანიდან. კიდე კაი ბავშვი რომ არ ავიყვანე ხელში, თორემ ვერც გადარჩებოდა მთლად სისხლშივიყავი გასვრილი! ერთი ცალპირა თოფი აქვს და წამოუღია და მესროლა ჭიშკრიდან. ბავშვიც დაჭრილია და მეზობელიც. ჩემი სიძე ლიხაურელია, 52 წლის, რვა წელია შეუღლებულნი არიან 22 წლით უფროსია ჩემს გოგოზე. გაშორება ვერ აიტანა. სულ გვემუქრებოდა და გვლანძღავდა"-გვიყვება ქალბატონი.

ყოფილ მეუღლსთან თავიდანვე დაძაბულ ურთიერთობაზე საუბრობს დაკავებულის მეუღლე, ინდირა კოსტავა:

“ჩემს ყოფილ ქმართან ბოლო დროს სულ დაძაბული ურთიერთობა მქონდა, სულ მაგინებდა, მემუქრებოდა, ჩხუბობდა. ამიტომ გადავწყვიტე გავშორებოდი. ოფიციალურად გავაწერე მასთან ხელი. სამი შვილი გვყავს. განქორწინების შემდეგ მეორედ გავთხოვდი. მყავს ხუთი თვის ბავშვი, რომელიც კინაღამ მომიკლა მისმა ნასროლმა ტყვიამ.

სულ მირეკავდა და მემუქრებოდა, ჩემთან შეხვედრას ითხოვდა. გუშინაც დამირეკა და მოკვლით დამემუქრა. ამ ზარის შემდეგ, რამდენიმე წუთში მოვიდა სახლთან მანქანით და არც გადმოსულა ისე ისროლა. გარეთ იყო დედაჩემი, მეზობლის ქალი და ჩემი ბავშვი. სამივე დაჭრილი იყო. "მედალფას" კლინიკაში უმკურნალეს. ბავშვის მდგომარეობა როგორი იქნება ჯერ არ ვიცით. საავადმყოფოდან კი გამოწერეს, მაგრამ ალბათ მოგვიწევს მკურნალობის გაგრძელება“ - გვითხრა დაკავებულის ყოფილმა მეუღლემ, ინდირა კოსტავამ.

დიტო დონაძე, რომელიც როგორც ჩვენთვის გახდა ცნობილი, პოლიციას მომხდარიდან რამდენიმე წუთში ჩაბარდა. ის ოზურგეთის მუნიციპალიტეტის სფელ ლიხაურში ცხოვრობს.