რკინიგზელების მხარდასაჭერად 1 სექტემბერს, 18:00 საათზე საქართველოს მთავრობის კანცელარიასთან მსვლელობა გაიმართება. აქციის ორგანიზატორები "აუდიტორია 115" და "პროფკავშირების ახალგაზრდული მოძრაობა" არიან. მოთხოვნა უცვლელია:

„14 რკინიგზელი შიმშოლობს რკინიგზის დეპარტამენტის წინ უკვე 2 კვირაზე მეტია. საქართველოს რკინიგზის თანამშრომლებისა და პროფკავშირული მოძრაობის წევრებს სასამართლო და პოლიცია კარვის გაშლის შესაძლებლობასაც არ აძლევს. ფიზიკურად დასუსტებული ადამიანები ღია ცის ქვეშ ათენებენ ღამეებს. ადმნისტრაციის მხრიდან ვერ ვხედავთ სიტუაციის მოსაგვარებლად გადადგმულ ნაბიჯებს. ერთადერთი რასაც საქართველოს რკინიგზის მენეჯმენტი აკეთებს არის ცრუ ინფორმაციების გავრცელება და საზოგადოების შეცდომაში შეყვანისა და საკუთარი სკამების გადარჩენის მიზნით.

მოთხოვნები უცვლელია : - დაუყოვნებლივ დაბრუნდნენ უკანონოდ გათავისუფლებული/გადაადგილებული თანამშრომლები სამსახურში.

- რკინიგზა დატოვონ საქართველოს რკინიგზის საზოგადოებასთან ურთიერთობის სამსახურის უფროსმა დაჩი ცაგურიამ და ინფრასტრუქტურის სამსახურის უფროსმა ვასილ ხორავამ.

- შესრულდეს წინა გაფიცვების შედეგად მიღწეული შეთანხმებები.

კიდევ ერთხელ მოვუწოდებთ ხელისუფლებას, დაუყოვნებლივ და ღიად, მოშიმშილეების დასაცავად, მათი მოთხოვნების გათვალისწინებით ჩაერიოს პროცესში და ხელი შეუშალოს რკინიგზის ადმინისტრაციის "შტრეიკბრეხერულ" ინიციატივებს. წინააღმდეგ შემთხვევაში პროცესი შეიძლება ტრაგიკული მოვლენებით გაგრძელდეს.

საზოგადოებას მართებს რომ ამ ბრძოლაში მარტო არ დატოვოს დაჩაგრული მშრომელები. შემოგვიერთდით დავუჭიროთ მხარი რკინიგზელებს მთავრობის კანცელარიასთან, საიდანაც დაიწყება მსვლელობა რკინიგზის დეპარტამენტის მიმართულებით“, - ნათქვამია სოციალურ ქსელში გავრცელებულ ინფორმაციაში.