დავით ქირიამ Kunlun Fight-ის მსოფლიო ჩემპიონატის მერვედფინალში რევანში აიღო - მაროკოელი მაროუნ თუთუ (Marouan Toutouh) დაამარცხა, 1/4 ფინალში გავიდა და მსოფლიო ჩემპიონის ტიტულის მოსაპოვებლად აგრძელებს ბრძოლას.

ბრძოლა, გუშინ, ჩინეთში გაიმართა.

აღსანიშნავია, რომ ერთი თვის წინ, დავით ქირია მაროკოელ სპორტსმენს დაუპირისპირდა , მსაჯების გადაწყვეტილებით დამატებითი რაუნდი დაინიშნა, რაც მაროკოელიც გამაჯვებით დასრულდა. ახლა კი ქირიამ რევანში აიღო. აღსანიშნავია, რომ მაროკოელი სპორტსმენი ფიზიკურ უპირატესობას ფლობს. კერძოდ, მისი სიმაღლე 190 სმ-ია და დავითზე 20 სმ-ით მაღალია.

ქირიამ, 11 მარტს, იტალიის დედაქალაქ რომში Kunlun Fight-ის მსოფლიო ჩემპიონატი ოთხკაცა ტურნირის შთამბეჭდავი გამარჯვებით დაიწყო.

დავით ქირიამ პირველ ბრძოლაში ENFUSION ვერსიით მსოფლიოს მოქმედი ჩემპიონი, ესპანელი ჯონაი რისკო დიდი უპირატესობით დაამარცხა, ხოლო ტურნირის ფინალში კი რუმინელი კრისტიან მილეა პირველივე რაუნდში ნოკაუტით გამოთიშა ასპარეზობას და მსოფლიო ჩემპიონატის მერვედფინალში გავიდა.

Kunlun Fight-ი წარმოადგენს კიკბოქსინგის ჩინურ უმსხვილეს ორგანიზაციას, რომელშიც მონაწილეობას იღებენ მსოფლიოს საუკეთესო სპორტსმენები. KUNLUN FIGHT-ის 2017 წლის მსოფლიო ჩემპიონატში მონაწილეობას იღებს სხვადსხვა ქვეყნის 64 საუკეთესო კიკბოქსიორი, რომლებიც საწყის ეტაპზე ასპარეზობენ ოთხკაციან ტურნირებში. ტურნირის გამარჯვებული გადადის მერვედფინალში და აგრძელებს ტიტულისათვის ბრძოლას.

დავით ქირიას საერთაშორისო ასპარეზზე კარგად იცნობენ.

დავით ქირია Glory-ს მსოფლიო ჩემპიონი 2014 წელს გახდა. ქართველმა სპორტსმენმა ფინალში ენდი რისტი ნოკაუტით დაამარცხა.

2009 წელს კი ევროპის ჩემპიონი გახდა კიოკუშინკაი კარატეში, არის შავი ქამრის მფლობელი.