ვაშინგტონში, "ამერიკის ხმის" ქართული რედაქციის ჟურნალისტი ნანა საჯაია, შესრულებული სამუშაოსთვის "ამერიკის ხმამ" - Voice of America - VOA ოქროს მედლით დააჯილდოვა.

ეს ყველაზე პრესტიჟული ჯილდოა, რომლითაც რედაქციას ჟურნალისტის დაჯილდოება შეუძლია.

ოქროს მედლის ნომინანტებს თანმშრომლები ასახელებენ , შემდეგ კი ხმის მიცემა ხდება. არჩეული კანდიდატების ვინაობა საბოლოოდ ოქროს მედლის შესარჩევ ჯგუფს ეგზავნება და საბოლოო გადაწყვეტილებასაც ისინი იღებენ.

როგორც ნანა ფეისბუკზე წერს, ოფიციალური დაჯილდოება ნოემბერში გაიმართება.

ნანა საჯაია, ვაშინგტონში, ამერიკის ხმის ქართული რედაქციის ჟურნალისტია.

ის ჟურნალისტიკის და მედია მენეჯმენტის, ასევე მასობრივი კომუნიკაციების მაგისტრია. სხვადასხვა დროს იყო ინგლისურენოვან გაზეთ Georgia Today-ს რედაქტორი, ჟურნალ ლიბერალის ვებ რედაქტორი და რადიო „ცხელი შოკოლადის“ მთავარი რედაქტორი. თანამშრომლობდა საერთაშორისო მედია ორგანიზაციებთან როგორიცაა BBC, France24 და TOL (TransitionsOnline).

2010-2014 წლებში იყო მედია მენეჯმენტისა და მედიის კვლევის მიწვეული პროფესორი თბილისის სახელმწიფო უნივერსიტეტში, კავკასიის მედია სკოლასა და საქართველოს საზოგადოებრივ საქმეთა ინსტიტუტში (GIPA). 2013-2014 წლებში იყო საერთაშორისო გამჭვირვალობა საქართველოს მედია ანალიტიკოსი.

„ამერიკის ხმა“ აშშ–ის მთავრობის ოფიციალური საგარეო, სამაუწყებლო ქსელია. VOA ინფორმაციას გადასცემს 46 ენაზე, რადიოსა და ტელევიზიის საშუალებით მთელი პლანეტის მასშტაბით (აშშ–ს ტერიტორიის გარდა). მისი სიხშირეების ტრანსლირება ხდება თანამგზავრების საშუალებით, ასევე – FM, AM და მოკლეტალღური რადიო დიაპაზონებით.