ისნის ბაზრობის დაზარალებული მესაკუთრეების თქმით, მათი ქონება დაზღვეული არ იყო

საზოგადოება - 13:10, 19 Aug, 2017

2556

ისნის ბაზრობის დაზარალებული მესაკუთრეები აცხადებენ, რომ მათი ქონება დაზღვეული არ იყო. ერთ-ერთი მოვაჭრის თქმით, ბაზრობაზე ე.წ. მეოადი ავტომობილების ნაწილები იყიდება, რის გამოც სადაზღვევო კომპანიების ინტერესებში მათი დაზღვევა არ შედის.

“ბაზრობის ადმინისტრაცია გვეუბნება, რომ მაღაზიები იყო თქვენს მფლობელობაში და თქვენ თვითონ მიხედეთო. ჩვენ ვართ დაზარალებულები. გუშინ ღამე ვნახე, რომ ჩემი მაღაზია მთლიანადაა დამწვარი, ჭერი ჩამონგრეულია. შემდეგ სამართალდამცველებმა ტერიტორია დაგვატოვებინეს. დღეს კი ადგილზე შესვლის საშუალება არ გვეძლევა”, - განაცხადა ემზარ ლეთოდიანმა.

ღამით, ისანში, მეორადი ავტონაწილების, ე.წ. "დაშლილების ბაზრობაზე", დაახლოებით ოთხ საათზე ხანძარი გაჩნდა. როგორც საგანგებო სიტუაციების მართვის ცენტრის წარმომადგენელმა დავით გელაშვილმა განაცხადა, ცეცხლი 1200 კვადრატულ მეტრ ფართობზე იყო გავრცელებული.ხანძრის ჩასაქრობად ადგილზე 20-მდე სახანძრო ბრიგადა და 100-მდე მეხანძრე-მაშველი მუშაობდა.

ამჟამად ხანძარი ლიკვიდირებულია.

ხანძრის გამომწვევი მიზეზი ჯერჯერობით უცნობია. მიმდინარეობს გამოძიება.

ზარალის შესახებ ინფორმაცია მოგვიანებით გახდება ცნობილი.