„საქართველოს რკინიგზის“ თანამშრომლების ნაწილი მეოთხე დღეა შიმშილობს. რკინიგზის დეპარტამენტთან გურჯაანის რკინიგზის თანამშრომლები არიან შეკრებილები, რომლებიც გურჯაანიდან მარნეულში მათი სამუშაო ადგილის გადატანასა და მგზავრობის ხარჯების დაფარვაზე უარის თქმას აპროტესტებენ. მათი განცხადებით, ადმინისტრაცია მათთან მოლაპარაკებას არ ცდილობს და ულტიმატუმის ენით საუბრობს.

აღნიშნულს ეხმაურება „საქართველოს რკინიგზის” საზოგადოებასთან ურთიერთობის სამსახურის უფროსი, დაჩი ცაგურია და აცხადებს, რომ გაფიცულებმა თავად არ იციან რა მოთხოვნები აქვთ:

„მათი მოთხოვნებიც აბსოლუტურად გაუგებარი და არაადეკვატურია. რა მოთხოვნები აქვთ, საერთოდ, თუ იციან? საქართველოს რკინიგზის მხოლოდ ერთი თანამშრომელი შეძლეს, მათ, რომელიც მათი აქტივისტია, რომ აეყოლიებინათ, 13 ათას 700 კაციდან და დანარჩენები არიან ირაკლი პეტრიაშვილის თანამშრომლები. ანუ ირაკლი პეტრიაშვილმა გამოგზავნა და თავის თანამშრომლებს აშიმშილებს ახლა რკინიგზასთან,“ - აცხადებს დაჩი ცაგურია.