მკვლელობა ჭონქაძეზე - გუშინ, 16 აგვისტოს მთაწმინდაზე, ჭონქაძის ქუჩაზე 47 წლის კახა ძნელაძე მოკლეს. მკვლელობის მოტივად შურისძიება სახელდება.
სამართალდამცავებმა დანაშაული ცხელ კვალზე გახსნეს, ამის შესახებ შსს-მ დღეს განცხადება გაავრცელა, რომლის მიხედვითაც ცნობილი ხდება, რომ დაკავებულია მიხეილ იაშვილი, რომელიც ამ დროისათვის წინასწარი დაკავების იზოლატორშია მოთავსებული.
იაშვილი დანაშაულს არ აღიარებს და პროტესტის ნიშნად შიმშილობას იწყებს, ასევე უარს ამბობს საქართველოს მოქალაქეობაზე.
იაშვილის ადვოკატმა დროებითი მოთავსების იზოლატორი ცოტა ხნის წინ დატოვა. უფლებადამცველის განცხადებით, იაშვილს ბრალი ოფიციალურად ჯერ არ აქვს წაყენებული. ადვოკატის თქმით, სამართალდამცავებმა ბრალდებული ჯერ მოწმის სახით დაკითხეს, შემდეგ კი ბრალდებულის სახით დააკავეს. ბრალის წაყენებისთვის სამართალდამცავებს 48 საათიანი ვადა აქვთ, ამ ვადის ფარგლებში მათ სასამართლოს უნდა მიმართონ, რომელმაც 24 საათის განმავლობაში უნდა იმსჯელოს აღკვეთის ღონისძიების სახეზე.
„მოწმის სახით დაკითხვის შემდეგ, ბრალდების მხარემ მიიღო გადაწყვეტილება მისი დაკავების შესახებ, ჩემი დაცვისქვეშ მყოფი კატეგორიულად უარყოფს მსგავს შემთხვევასთან კავშირს, ის მართალია ადასტურებს, რომ იცნობდა გარდაცვლილს, თუმცა, დიდი ხნის წინ, ბოლოს ის არ უნახავს, მასთან დაკავშირებით არაფერი იცის“, - აცხადებს ადვოკატი
მიხეილ იაშვილის დედა აცხადებს, რომ მისი შვილი სამჯერ არის ნასამართლევი:
„ეძებდნენ იარაღს, ეძებდნენ ნარკოტიკს, არც ერთი არ აღმოჩნდა სახლში. ჩხრეკის მომენტში დაავლეს ხელი და გაიტაცეს სახლიდან, ქუჩაში რაღაც იპოვეს, ჩემი შვილის იარაღია? ან რა შეხება აქვს ჩემს შვილს იმ იარაღთან რაც ქუჩაში იპოვეს? არანაირი უთანხმოება არ ჰქონიათ“, - აღნიშნავს იაშვილის დედა.
ჭონქაძის ქუჩაზე მომდარი მკვლელობის გამოძიება სისხლის სამართლის კოდექსის ორი მუხლით მიმდინარეობს, 108-ე - განზრახ მკვლელობა და 236-ე - იარაღის უკანონო ტარება.
მასალის გამოყენების პირობები