"ბევრი ბავშვი წელს სკოლაში ვერ წავა" - ჩერნოვეცკის ფონდი მიმართვას ავრცელებს

საზოგადოება - 13:42, 15 Aug, 2017

2520

"უკან მოხედვას ვერ მოვასწრებთ ისე ჩაივლის აგვისტო და სექტემბერიც შემოაღებს კარებს, დაიწყება ახალი სასწავლო წელი.

სწორედ ახლაა იმის დრო, რომ დავიწყოთ ბავშვის სკოლისთვის მომზადება, დროულად შევიძინოთ ყველაფერი, რაც საჭიროა.

ყოველი ბავშვი ოცნებობს სკოლაში ახალ ტანსაცმელში გამოწყობილი წავიდეს, ახალი ჩანთით და ახალი სასკოლო ნივთებით და მშობლებიც მზად არიან ყველაფერი გაიღონ, რათა გაახარონ თავიანთი პატარები.

მაგრამ დღესდღეობით ბავშვის სკოლაში წასასვლელად მომზადება არც ისე იოლი საქმეა. განსაკუთრებით ამ მხრივ უჭირთ სოციალურად დაუცველ ოჯახებს, რომელთა შემოსავალი საარსებო მინიმუმზე დაბალია და მხოლოდ საკვებზე თუ ჰყოფნით, ისიც ყოველთვის არა.

სამწუხაროდ, ბევრი ბავშვი სოციალურად დაუცველი ოჯახებიდან წელს სკოლაში წავა ძველმანებში, დახეული ფეხსაცმლით, ჩანთისა და ელემენტარული სასკოლო ნივთების გარეშე.

ისეთებიც იქნებიან, ვინც საერთოდ ვერ მოახერხებს სკოლაში წასვლას. მათ მშობლებს არა აქვთ საშუალება უყიდონ შვილებს ტანსაცმელი, სახელმძღვანელოები, ზურგჩანთა, რვეულები…

ამ ბავშვების მშობლები მძიმე მდგომარეობაში აღმოჩნდნენ. როგორ უნდა მოამზადოს სკოლისთვის მარტოხელა დედამ შვილი, როცა სოციალური შემწეობა პურზე ძლივს ჰყოფნის?..და ოჯახები, სადაც მშობლები შრომის უუნარონი არიან? თუ ასეთები არ არსებობენ?

სამხუხაროდ, არსებობენ და მათი რიცხვი არც ისე ცოტაა.

ჩერნოვეცკის ფონდი მოგმართავთ თქვენ, ყველა კეთილ და გულისხმიერ ადამიანს, ვისთვისაც არ არის სულერთი უმწეო ოჯახების ბედი, გულთან ახლოს მიიტანოთ სოციალურად დაუცველი ოჯახების მდგომარეობა. იქნებ შემოგრჩათ კარგ მდგომარეობაში მყოფი თქვენი შვილის შარშანდელი ზურგჩანთა, ან გაქვთ ტანსაცმელი, რომელიც მისთვის უკვე ზომით პატარაა… ან იქნებ მშობლის მზრუნველობას მოკლებულ ბავშვს თუნდაც ერთ რვეულს უყიდით?! გთხოვთ, გამოიჩინოთ გულისხმიერება სხვისი გასაჭირის მიმართ!

წინასწარ გიხდით მადლობას გამოჩენილი თანადგომისა და დახმარებისთვის.

მეგობრებო, მოდით ღირსეულად გავუშვათ ბავშვები სკოლაში, მივცეთ მათ ნორმალური სწავლის შანსი, რათა გახდნენ განათლებული და საზოგადოებისთვის სასარგებლო ადამიანები. ჩვენ ერთად შეგვიძლია დავეხმაროთ მათ, რამეთუ ყველა ბავშვი ჩვენი ქვეყნის სიმდიდრეა!

თუ ამ მიზნისთვის გაქვთ ფინანსური შესაძლებლობა, თანხა შეგიძლიათ გადარიცხოთ ფონდის ანგარიშზე GE15TB7194336080100003 ან GE64BG0000000470458000 (დანიშნულება: სასკოლო ნივთები) ან გადაიხადოთ პირდაპირ საიტიდან https://chernovetskyifund.ge/ge/projects/221-saskolo-nivtebi/

დეტალური ინფორმაციის მისაღებად, გთოვთ დარეკოთ ტელეფონებზე: 032 219 33 21 +995 977 40 45"- აღნიშნულია ჩერნოვეცკის ფონდის მიმართვაში