მოშლილი საკანალიზაციო სისტემა და ანტისანიტარია გორში-სადგურის მოსახლეობა დახმარებას ითხოვს

გორში, რკინიგზის სადგურის დასახლებაში, უფლისციხის ქუჩის მცხოვრებლები დახმარებას ითხოვენ.

„ნიუპოსტის“ კორესპონდენტის ცნობით, სოფელ ატენის გაზიფიცირების გამო, ქუჩა თითქმის სამი თვეა გადათხრილია, რაც ადგილობრივების ყოფას გაუსაძლის ხდის. ისინი ამბობენ, მათ ქუჩაზე თითქმის შეუძლებელია გადადგილება, მოიშალა საკანალიზაციო სისტემა და ანტისანიტარიაა. ისინი ქალაქის მერიას და გამგეობას უყურადღებობაში სდებენ ბრალს და პრობლემის მოუგვარებლობის შემთხვევაში აქციების გამართვით იმუქრებიან.

მოსახლეობის შენიშვნებს არ იზიარებენ გამგეობაში, სადაც ირწმუნებიან, რომ პრობლემის მოგვარება მათი კომპეტენციის ფარგლებს სცილდება, რადგან, ატენში გაზიფიცირების სამუშაოებს ინფრასტრუქტურის სამინისტრო, კომპანია „სოკართან“ ერთად აწარმოებს. პრობლემის მოგვარების პირობას სდებს გორის მერია, სადაც გვეუბნებიან, რომ შესაბამის სამუშაოებს ხვალიდან დაიწყებენ და უფლის ციხის ქუჩის მცხოვრებლებს, მოშლილი საკანალიზაციო სისტემის და ანტისანიტარიის პრობლემა აღარ შეაწუხებთ.