ხმაურის ნორმის გადაჭარბებისთვის ჯარიმები დღეიდან ამოქმედდება

საზოგადოება - 09:57, 15 Aug, 2017

16976

15 აგვისტოდან ხმაურის შესახებ კანონი ძალაში შევა. პარლამენტმა ხმაურის შესახებ კანონი მესამე მოსმენით, 28 ივნისს 82 ხმით დაამტკიცა.

კანონის მიხედვით დღის (08.00 სთ- 23.00 სთ) და ღამის (23.00 სთ- 08.00 სთ) საათებში ხმაურის დასაშვები ნორმების გადამეტებისთვის ადმინისტრაციული პასუხისმგებლობა განისაზღვრება.

“ადმინსიტრაციულ სამართალდარღვევათა კოდექსში” შეტანილი ცვლილებების მიხედვით, დღისა და ღამის საათებში საცხოვრებელი სახლების, კერძო საკუთრების, უძრავი ქონების და საზოგადოებრივი/საჯარო დაწესებულების შენობაში აკუსტიკური ხმაურის დასაშვები ნორმების გადამეტება ფიზიკური/იურიდიული პირის გაფრთხილებას გამოიწვევს.

გაფრთხილებიდან ერთი წლის განმავლობაში სამართალდარღვევის მეორედ ჩადენა- გამოიწვევს ფიზიკური პირის დაჯარიმებას 150 (ასორმოცდაათი) ლარის ოდენობით, ხოლო იურიდიული პირის- 500 (ხუთასი) ლარის ოდენობით. დაჯარიმებული პირის მიერ იმავე ქმედების განხორციელება ადმინისტრაციული სახდელდადებული პირის სტატუსის გაუქმებამდე გამოიწვევს დაჯარიმებას ფიზიკური პირის- 300 (სამასი) ლარის ოდენობით, იურიდიული პირის – 1000 (ათასი) ლარის ოდენობით.

ხმაურის დასაშვები ნორმები დადგენილია „საცხოვრებელი სახლების და საზოგადოებრივი (საჯარო) შენობების სათავსებში და ტერიტორიებზე აკუსტიკური ხმაურის ნორმების შესახებ“ ტექნიკური რეგლამენტით.