რამ გამოიწვია GEM FEST-ზე ინტოქსიკაცია - თეთრი ხმაური განცხადებას ავრცელებს

საზოგადოება - 15:50, 05 Aug, 2017

7575

თეთრი ხმაურის მოძრაობა მოსახლეობას იმ ნივთიერების შესახებ აფრთხილებს, რომელმაც Gem Fest-ზე სტუმრებს სავარაუდოდ ინტოქციკაცია გამოიწვია:

"ვრცელდება ინფორმაცია, GEM fest-ზე მყოფი რამდენიმე ადამიანის მძიმე ინტოქსიკაცია შესაძლოა გამოწვეული იყოს ნივთიერება GHB-ით. მიუხედავად იმისა, რომ აღნიშნული ჯერ ოფიციალურად არ დადასტურებულა, მომატებული რისკების თავიდან აცილების მიზნით, ვავრცელებთ მცირე ინფორმაციას ამ ნივთიერების, მის მოხმარებასთან დაკავშირებული რისკების და აუცილებელი რეკომენდაციების შესახებ. GHB, იგივე [G, Georgia Home Boy, Juice] ტოქსიური პრეპარატია ზედოზირების მაღალი რისკებით. ის ცნს-ის დამთრგუნველი მოქმედებით გამოირჩევა და დოზის მცირე ცვლილებაც კი მძიმე ზედოზირების რისკს ქმნის, რის დროსაც ითრგუნება სასუნთქი სისტემა, შესაძლოა ადამიანი ჩავარდეს კომაში და/ან გარდაიცვალოს.

ზედოზირების ნიშნებია:გულყრა, კოორდინაციის დაკარგვა, კრუნჩხვები, სხეულის ტემპერატურის დაცემა, შენელებული სუნთქვა და გულის ცემა, ცნობიერების დაკარგვა, კომა.

არ მისცეთ GHB მიღებულ ადამიანს ჩაძინების შესაძლებლობა (რომც მოგეჩვენოთ რომ ის ცუდად არ არის);

თუ პირს დაეწყო პირღებინება და ამავდროულად ის უგონოდ არის ან ვერ მართავს საკუთარ სხეულს, გადააბრუნეთ ის მუცლით ქვემოთ რომ ღებინებამ არ გამოიწვიოს ადამიანის დახრჩობა;

არ მიიღოთ სხვა ნარკოტიკულ საშუალებებთან ერთად. მისი არევა ალკოჰოლთან, სტიმულანტებთან (MDMA, ექსტაზი, ამფეტამინი) ოპიატების ჯგუფის ნარკოტიკულ საშუალებებთან ზრდის ზედოზირების რისკს.

არ დარჩეთ მარტო GHB-ის მოქმედების დროს;

არ მიიღოთ GHB თუ გაწუხებთ გული, თირკმელი ან გაქვთ ეპილეფსიური შეტევები.

კრუნჩხვების შემთხვევაში შეგიძლიათ მიმართოთ ბენზოდიაზეპინების ჯგუფის პრეპარატებს, მაგალითად დიაზეპამი (ვალიუმი), რომლებიც ასევე ცენტრალური ნერვული სისტემის დამთრგუნველები არიან, მაგრამ GHB-ის აგონისტებიც არიან და ამ უკანასკნელის მოქმედების გაუვნებელყოფა შეუძლიათ.

ყველაზე მძიმე პერიოდი მიღებიდან 20-120 წუთის განმავლობაშია"- წერია განცხადებაში.