იუსტიციის უმაღლეს საბჭოს საერთაშორისო გამჭვირვალობა საქართველო თავმჯდომარეების თვითნებურად დანიშვნასა და გათავისუფლებაში ადანაშაულებს. მესამე სექტორში აცხადებენ, რომ საბჭომ თბილისის საქალაქო სასამართლოს კოლეგიის თავმჯდომარე, გიორგი ებანოიძე, თანამდებობიდან კანონის გვერდის ავლით გადააყენა.

„უკანასკნელ სხდომაზე საბჭომ კანონის გვერდის ავლით თანამდებობიდან გათავისუფლა თბილისის საქალაქო სასამართლოს სისხლის სამართლის საქმეთა კოლეგიის თავმჯდომარე, გიორგი ებანოიძე. საბჭოს წევრები აცხადებდნენ, რომ ისინი უკმაყოფილონი არიან გიორგი ებანოიძის თავმჯდომარეობით, რომ ის ვერ უმკლავდება საქმეთა ნაკადს და ა.შ. თუმცა, გიორგი ებანოიძე ამ შემთხვევაში სხდომაზე მოწვეული არ ყოფილა, მას არ მიეცა საკუთარი მოსაზრების წარმოჩენის საშუალება. მისი გათავისუფლების საკითხი დღის წესრიგით არ ყოფილა გათვალისწინებული და საბჭომ იმავე სხდომაზე მიიღო მისი გათავისუფლების გადაწყვეტილება და მის ნაცვლად მოვალეობის შემსრულებელიც დანიშნა. მნიშვნელოვანია აღინიშნოს, რომ, თუკი საბჭოს ჰქონდა პრეტენზიები, როგორც თავმჯდომარესთან, ამ შემთხვევაში მნიშვნელოვანი იყო დისციპლინური სამართალწარმოების პროცესს გაჰყოლოდა საბჭო. კონკრეტული ბრალი გამოეკვეთა ებანოიძისა იმ შემთხვევაში, თუ სისხლის სამართლის საქმეთა კოლეგიაში მართლაც არის საქმეთა სიმრავლე. თუმცა, საბჭომ კანონის გვერდის ავლით და კანონის უხეში დარღვევით, კოლეგიების გაერთიანების მიზეზით, გაათავისუფლა გიორგი ებანოიძე თანამდებობიდან და მას საერთოდ არ მიეცა საკუთარი პოზიციის დაფიქსირების საშუალება,“ - განაცხადა საერთაშორისო გამჭვირვალობა - საქართველოს იურისტმა, ოლიკო შერმადინმა.