10 წელი, საშინელ პირობებში დამწყვდეული დათვი - თამაზ ელიზბარაშვილი და ნატა ფერაძე ცხოველის გადარჩენას ითხოვენ

საზოგადოება - 13:44, 29 Jul, 2017

3812

დიღომში, ბელიაშვილის ქუჩაზე, კერძოდ, ,,თბილსერვის ჯგუფის“ მოპირდაპირე მხარეს მდებარე კერძო ტერიტორიაზე, 10 წელია ტყვეობაში ჰყავთ დათვი, საშინელ პირობებში. პატრონს ცხოველი 8 კვადრატულ გალიაში ჰყავს და ვოლიერს იატაკიც კი არ აქვს.

დათვის გადასარჩენად წუხელ ”პარტიზანი მებაღეების” წარმომადგენელი ნატა ფერაძე და ცხოველთა თავშესაფრის მეპატრონე თამაზ ელიზბარაშვილი ცდილობდნენ.

თამაზ ელიზბარაშვილი თავის ჯგუფთან და ,,გარემოს დაცვის სამინისტროს“ წარმომადგენლებთან ერთად იმყოფებოდა, რათა დათვი ცხვარიჭამიის ნაკრძალ-თავშესაფარში გადაიყვანონ, მაგრამ დათვის ე.წ. პატრონი წინააღმდეგობას უწევდა მათ.

თამაზ ელიზბარაშვილი საზოგადოებას თანადგომისკენ მოუწოდებს. მისი თქმით, მხოლოდ ერთი კაცი ვერ შეძლებს დათვის გადარჩენას: ,, დაუყოვნებლივ მოვითხოვ გარემოს დაცვის სააგენტოსგან, დატყვევებული დათვი იქნას გამოხსნილი ამ წამებისგან. საჭიროა, ხალხის თანადგომა. ცხოველის სიყვარულით ყველა გულანთებულ ადამიანს და ასევე ტელევიზიებს მოვუწოდებ ჩაერთონ ამ საქმეში, გვერდით დამიდგნენ , რათა ერთობლივად გადავარჩინოთ დათვის სიცოცხლე“. - ამბობს ელიზბარაშვილი.

,,სახელმწიფოს არ შეუძლია ხელი შეუწყოს მოხალისე ადამიანს, რომელიც ზრუნავს დათვებზე, ეს არის ძალიან უხეში კანონდარღვევა, ეს არის სისხლის სამართლის დანაშაული, დათვის არის დაავადებული და არადათვურ პიობებში“ - განაცხადა ნატა ფერაძემ.