"გვექცეოდნენ როგორც მონებს, არ მეგონა თუ ცოცხალი დავბრუნდებოდი"- ისრაელიდან დეპორტირებული ქართველები უმძიმეს დღეებს იხსენებენ

საზოგადოება - 13:32, 28 Jul, 2017

14920

ისრაელიდან დეპორტირებული ქართველები, ციხეში გატარებულ უმძიმეს დღეებს იხსენებენ. საქართველოს მოქალაქეები აცხადებენ, რომ საბყრობილეში მათ არაადამიანურად ებყრობოდნენ.

მათი მონაყოლის მიხედვით, რამდენიმე ქართველი ქვეყანაში გაურკვეველი მიზეზების გამო არ შეუშვეს და საზღვარზევე დააკავეს.

“გადაგვიყვანეს ოთახში სადაც, ყველა ქართველი ერთად შეგვკრიბეს, მთელი ღამის თევა მოგვიწია იქ. ყველანაირი ახსნა განმარტების გარეშე, კითხვებს ვსვამდით თუ როდის იქნებოდა საქართველოში დაბრუნება, საერთოდ არაფრად არ ჩაგვაგდეს. ელემენტარული წყლის საშუალებაც არ იყო. ჩაგვსვეს ავტობუსში და გადაგვიყვანეს ციხეში. ციხეში იყო ძალიან გაუსაძლისი მდგომარეობა. 12 კაციან საკანში 20 კაცი ვისხედით. გვექცეოდნენ როგორც მონებს. მოახდინეს ფსიქოლოგიური ზეწოლა“ - განაცხადა ერთ-ერთმა დაკავებულმა გოგა ჩანგელიამ.

ერთ-ერთი ქალბატონი კი ყვება, რომ ისრაელში მისი შვილის ჯანმრთელობის გამო იმყოფებოდა.

„7 წელია ჩემი შვილის სიცოცხლისთვის ვინბრძვი, არ მეგონა ისრაელიდან ცოცხალი თუ ჩამოვიდოდი“- აცხადებს თეონა ჩიხლაძე.

მისი თქმით, თელავივის რამლეს ციხეში მასზე ფიზიკური ძალადობა სცადეს.

„აგრესიულად იქცეოდნენ, შეურაცხყოფას გვაყენებდნენ, ხელითაც კი აპირებდნენ შემხებოდნენ, მაგრამ წინააღმდეგობა რომ გაუწიე, მიხვდნენ რომ არაფერს დავუთმობდი. ციხეში რომ მიგვიყვენეს, ჩემი მეუღლე დაბლა იცდიდა მე კი მეორე სართულზე ამიუვანეს და ბავშვთან ერთად, ისეთ ოთახში ჩამკეტეს სადაც საშინელი ანტისანიტარია იყო. ბავშვი ისტერიკაში ჩამივარდა“- აღნიშნავს თეონა ჩიხლაძემ.

რამლეს ციხეში მყოფი კიდევ ერთი ქართველი ქალის ნათესავი კი ამბპბს, რომ ამ ციხეში 28 ქართველი ქალბატონია დაკავებული, რომლებიც დამლაგებლებად მუშაობდნენ თელავივში.

„სამართალდამცველები სახლებში შეუცვივდნენ და იქიდან გადაიყვანეს ციხეში. ეს ქალბატონები რამდენიმე დღის განმავლობაში ელოდებოდნენ დეპორტაციას, თუმცა პროცესი გაჭიანურდა, მაგრამ მათ ამის მიზეზი არ განუმარტეს”- აცხადებს მოქალაქე.

ისრაელში საქართველოს კონსულის თქმით, დაკავებულების დეპორტაცია საქართველოში ეტაპობრივად მოხდება.

“საიმიგრაციო სამსახურს უკვე შეძენილი აქვს მათთვის ბილეთები და მათ იციან როდის დაბრუნდებიან. ჩემთან შეხვედრაზე მათ არცერთს არ დაუფიქსირებია რაიმე პრეტენზია, მოპყრობასთან დაკავშირებით. დეპორტაცია მოხდება ეტაპობრივად,“ - განაცხადა ისრაელში საქართველოს კონსულმა ალექსანდრე ჯიშკარიანმა.