შსს-ს მაშველებმა დახმარება კიდევ ორ ტურისტს და საქართველოს 1 მოქალაქეს აღმოუჩინეს

საზოგადოება - 10:55, 28 Jul, 2017

1622

შსს-ს მაშველებმა დახმარება კიდევ ორ ტურისტს და საქართველოს 1 მოქალაქეს აღმოუჩინეს:

"შსს-ს საგანგებო სიტუაციების მართვის სააგენტოში გადაუდებელი დახმარების ოპერატიული მართვის ცენტრ - „112“-დან შემოვიდა შეტყობინება იმის შესახებ, რომ ხელვაჩაურის მუნიციპალიტეტის სოფელ შარაბიძეებში, მდ. ჭოროხის ადიდების შედეგად, 2 აზერბაიჯანელი ტურისტი მდინარის მეორე ნაპირზე აღმოჩნდა და გამოსვლას ვეღარ ახერხებდა. შეტყობინების მიღებისთანავე, ქ. ბათუმის საზღვაო-სამაშველო განყოფილების ჯგუფებმა მოახდინეს უსწრაფესი რეაგირება და რამდენიმე წუთში აზერბაიჯანის ორი მოქალაქე უსაფრთხო ადგილზე უვნებლად გამოიყვანეს.

ტურისტების ინფორმაციით, მათი 8-კაციანი ჯგუფი ბუნებაში დასასვენებლად იმყოფებოდა, რა დროსაც მდინარეში წყლის დონემ მატება დაიწყო. 6-მა მათგანმა გამოსვლა მოასწრო, ხოლო 2 ჭოროხის მეორე ნაპირს შემორჩა. ტურისტები შეშინდნენ, რის გამოც შსს-ს საგანგებო სიტუაციების მართვის სააგენტოს მაშველების დახმარება ითხოვეს. აზერბაიჯანის მოქალაქეებმა ქ. ბათუმის საზღვაო-სამაშველო განყოფილების 2 ჯგუფისგან უმოკლეს ვადაში მიიღეს ადეკვატური დახმარება.

მდ. ჭოროხის ადიდებამ პრობლემა, ტურისტების გარდა, 1 ადგილობრივ მცხოვრებსაც შეუქმნა. 50 წლამდე ქალბატონი ხელოვნურად წარმოქმნილ კუნძულზე აღმოჩნდა, რის გამოც მაშველების დახმარება ითხოვა. ქ. ბათუმის საზღვაო-სამაშველო განყოფილების მაშველებმა უსაფრთხო ადგილზე მალევე გამოიყვანეს"- აცხადებენ უწყებაში.