ერთიანი ეროვნული გამოცდის დანარჩენი შედეგები ორშაბათიდან გამოქვეყნდება

განათლება - 13:55, 27 Jul, 2017

11961

გამოცდების ეროვნულ ცენტის ხელმძღვანელმა მაია მიმინოშვილმა დღევანდელ პრესკონფერენციაზე განაცხადა, რომ ზოგადი უნარების გამოცდის შემდეგ სხვა დანარჩენი შედეგები ორშაბათიდან გამოქვეყნდება.

მისივე თქმით გამოცდის მესამე ვარიანტი ბევრად რთული იყო ვიდრე დანარჩენი.

"ამ მონაცემებით აღმოჩნდა, რომ მესამე ვარიანტისთვის გამსვლელი ქულა იქნება 21. ყველა დანარჩენი ვარიანტისთვის გამსვლელი ქულა 24 და მეტია. ანუ კომპეტენციის მინიმალურ ზღვარზე საუბრობს და მესამე ვარიანტისთვის ეს ქულა გახლავთ 21.

რაც შეეხება იმ აბიტურიენტების რაოდენობას, რომლებმაც ვერ მოახერხეს ზღვარის გადალახვა, თქვენ იცით, რომ ზოგად უნარებს 4 ენაზე აბარებენ: ქართული, რუსული, აზერბაიჯანული და სომხური, ერთობლივად თუ ავიღებთ და არა მხოლოდ ქართულენოვან აბიტურიენტებს, დაახლოებით 15%-ია იმ აბიტურიენტების რაოდენობა, რომლებმაც კომპეტენციის მინიმალური ზღვარი ვერ გადალახეს.

ასე რომ, როგორც მოგეხსენებათ, დაახლოებით იგივე იყო ეს პროცენტული მაჩვენებელი იმ აბიტურიენტებისთვის, რომლებმაც ვერ მოახერხეს კომპეტენციის მინიმალური ზღვარის გადალახვა ზოგად უნარებში წინა წლებშიც" - აღნიშნა მიმინოშვილმა.

დღეს 12:00 საათზე ზოგადი უნარების პასუხები გამოქვეყნდა.

ერთიანი ეროვნული გამოცდები 3 ივლისს დაიწყო. საქართველოს მასშტაბით სულ 22 საგამოცდო ცენტრი იყო გახსნილი