ქართული კრიმინალური დაჯგუფება იტალიაში - მილანში პოლიციამ ბინის მძარცველები დააკავა

კრიმინალი - 14:10, 25 Jul, 2017

8362

იტალიის პოლიციამ, მილანში ბინების ქურდობაში ეჭვმიტანილი დამნაშავეთა ჯგუფი დააკავა, რომლის 4 წევრიც „ქართველთა დაჯგუფების“ წარმომადგენელია. იტალიური მედიის ცნობით დამნაშავეთა ჯგუფი ბინებს მთელი მილანის ტერიტორიაზე ქურდავდა, ერთ-ერთი ბინის გაქურდვის დროს კი მათ დიასახლისიც გაკოჭეს და მას სიკვდილით ემუქრებოდნენ. როგორც იტალიური მედია წერს აღნიშნული დაჯგუფების ლიდერი იყო 44 წლის იტალიის მოქალაქე დინო გავაცენი, წარმოშობით ხორვატი, ზედმეტსახელად „ექიმი“ (მას საკუთარ ქვეყანაში ექიმის ხარისხი ქონდა.) , რომელიც მილანში სათამაშო აპარატების გაქირავებით იყო დაკავებული, ამასთანავე სწორედ ის არჩევდა გასაქურდ სახლებს და ზრუნავდა ნაქურდალი ნივთების გასაღებაზე.

ჯგუფის გამოსავლენად და დასაკავებლად მუშაობა რამდენიმე თვე მიმდინარეობდა, საბოლოოდ მათი დაკავება მას შემდეგ გახდა შესაძლებელი, რაც ერთ-ერთ პირს გასაქურდ სახლში დარჩა ტელეფონი, რომელითაც ჯგუფის წევრები ერთმანეთს უკავშირდებოდნენ და მოქმედების კოორდინაციას ახდენდნენ.

პოლიციამ ნაქურდალი ნივთები, მათ შორის ძვირადღირებული საათები და სამკაულები ამოიღო. საქმეზე ძიება გრძელდება.

როგორც იტალიური მედია იტყობინება 2017 წელს სამართალდამცავებმა ბინების ქურდობითვის 61 ადამიანი დააკავეს, რომელთა შორის 18 ეროვნებით ქართველია.