"ნატყვიარები მთელ სხეულზე ამჩნევია...მოწმე მოიშორეს"- გურიაში მომხდარი სასტიკი მკვლელობის ახალი დეტალები

კრიმინალი - 13:09, 21 Jul, 2017

16707

ოზურგეთში, გუშინ მომხდარი შემზარავი მკვლელობის მოტივი და სასტიკ დანაშაულში ბრალდებულთა ვინაობა უცნობია. ვიცით მხოლოდ ის, რომ ორი ახალგაზრდა: გურამ ფოცხიშვილი და მისი დის ქმარი დიმა ომოლჩენკო ავტომობილში ჩაცხრილეს.

„ნიუპოსტმა“ ოზურგეთში, შემოქმედის ქუჩაზე მომხდარი მკვლელობის შესახებ დამატებითი დეტალის გარკვევა შეძლო.

მოკლულთა ოჯახის წევრები, პირად საუბრებში აცხადებენ, რომ ახალგაზრდები შურისძიებას ემსხვერპლნენ. მათი მონაყოლის მიხედვით, ბიჭების ჩაცხრილვა წლების წინ მომხდარი კრიმინალური შემთხვევის გაგრძელებაა.

როგორც ირკვევა, დიმა ომოლჩენკო შემთხვევის ადგილზე შემთხვევით მოხდა, რის შემდეგაც სასტიკი მკვლელობის ავტორებმა მთავარი მოწმე მოიშორეს.

„ნიუპოსტის“ ინფორმაციით, გურამ ფოცხიშვილმა სახლიდან გასვლისას ოჯახის წევრებს უთხრა, რომ ის და დიმა სათევზაოდ მიდიოდნენ, მანქანაში შესაბამისი აღჭურვილობაც ჩაალაგეს. ოზურგეთში ყვებიან, რომ მდინარისკენ მიმავალი ავტომობილი, მოულოდნელად, მაღალი სისწრაფით, შემოქმედის ქუჩის მიმართულებით გაბრუნდა. როგორც ჩანს, ბრალდებულებმა ფოცხიშვილი ე.წ გარჩევაზე დაიბარეს, დიმა ომოლჩენკო კი ნათესავს ამ შეხვედრაზე გაჰყვა.

„დიმა უწესიერესი ახალგაზრდა იყო. მას ტრაგიკული ცხოვრება აქვს გამოვლილი. 5 წლის იყო, როცა მშობლები დაეღუპა , მიუსაფარი ბავშვი მეუფე იოსებმა სამთავროში შეიფარა და შვილივით გაზარდა. ცოლის მოყვანის შემდეგ, ბიჭს ბინა მეუფემ შეუძინა. პასუხისმგებლობით სავსე ბიჭი იყო, ამიტომ საბერძნეთში წავიდა და ოჯახს მძიმე შრომის შედეგად მიღებული გასამრჯელოთი არჩენდა. რამდენიმე წლის წინ ჩამოვიდა და გუშინ ჩაცხრილეს, ნატყვიარები მთელ სხეულზე ამჩნევია“- განუცხადა „ნიუპოსტს“დიმა ომოლჩენკოს ახლობელმა.

დიაკვანი დავით გოგიტიძე, რომელიც დიმა ომოლჩენკოსთან ერთად ტაძარში მსახურობდა (დიმა ომოლჩენკო - სტიქაროსანი და მეუფეს მძღოლი იყო) აცხადებს, რომ ახალგაზრდა მამაკაცს კრიმინალთან შემხებლობა არასდროს ჰქონია.

გოგიტიძის თქმით, დიმა ომოლჩენკო მკვლელობამდე ერთი საათით ადრე ნახა.

„ძალიან მშვიდად და წყნარად იყო. ეს შემთხვევითობის მსხვერპლია, დიმა უკონფლიქტო ადამიანი იყო...“- ამბობს დიაკვანი.

შემოქმედის ეპარქიის საზოგადოებასთან ურთიერთობის სამსახურის ხელმძღვანელი, ხათუნა ცერცვაძე დიმა ომოლენკოს მეგობარია. ის მოკლულის მძიმე წარსულზე და პიროვნულ ღირსებებზე საუბრობს:

„მამა ვასილმა აღმოაჩინა პატარა თეთრი საყვარელი ბიჭი თავისთან ზრდიდა...მერე მეუფემ ნახა და ეტყობა, თვალებში რომ ჩახედა, დაინახა ამხელა ტრაგედია ელოდა და უნდოდა მისი ფრთის ქვეშ ყოფნით დაეფარა....და გაიზარდა შემოქმედის ეპარქიაში ..მეუფის ფრთის ქვეშ ეკლესიის წიაღში...ერთგული და პატიოსანი კაცი დადგა...მშრომელი და სიკეთისმოყვარე...მეუფისგან სითბო სიყვარული და შრომისმოყვარეობა კარგად შეისწავლა და ასე გვინაწილებდა სიყვარულს ყველას ჩვენი გაზაფხულააა....დედობას იღუმენიები და დედები უწევდა. ყველას შვილივით გულში გვყავდა ჩვენი დიმიკოოო... ასე მოვდიოდით ერთად ბევრი წელი...ბედნიერი წუთები და ერთად ყოფნის სიამოვნება გვავსებდა...და ყველა ასე ვერთიანდებოდით მეუფის ირგვლივ. უფრო სწორად, მეუფე გვაერთიანებდა მის ირგვლივ...

მერე, ცხოვრების გზაჯვარედინზე გავედით...დიმიკო დაქორწინდა და ეს იყო ყველაზე ბედნიერი და ლამაზი დღე. ყველა დიმიკოს ირგვლივ ვიყავით და გვინდოდა ყველაფერი საუკეთესო მისთვის ყოფილიყო...მერე დიმიკომ ეს პასუხისმგებლობა კარგად გაისიგრძეგანა და ოჯახის სარჩენად საზღვარგარეთაც წავიდა. დღედაღამ მუშაობდა ორივე ცოლ-ქმარი , რომ რაიმე შეექმნათ მერე დაბრუნდნენ სამშობლოში ,თავიანთი ბუდე მოაწყვეს და აქაც გააგრძელეს შრომა ...ასე პატიოსნად და დაუზარელად გაჰქონდათ ცხოვრების ჭაპანი..დღეს კი ჩემი საწყალი ბიჭი ასე უმოწყალოდ წავიდა ამ ქვეყნიდან დატოვა სიყვარული და პატარა ბიჭი ,ბიჭი რომელიც მამის ასლია. ბიჭი, რომელმაც უმამოდ უნდა გაიზარდოს. მართალია, ემახსოვრება საყვარელი მამიკო, მაგრამ მაინც სხვებისგან მოუწევს გაიგოს როგორი თბილი გული ჰქონდა მის უბედო მამას,როგორი ერთგული იყო,,,როგორი მშრომელი იყო და სულ პატარა ბიჭმა რაც შეეძლო ყველაფერი დაუტოვა მის შვილს. რაც მთავარია, პატიოსანი სული და სახელი დატოვა....მაგრამ, მაინც შემთხვევითობის მსხვერპლი გახდა ...ასე დაუშვა უფალმა ეტყობა ღვთის დაკარგვისგან გადაარჩინა...მადლობა უფალს, ეს ალბათ ყველაზე კარგი პერიოდი იყო მისი ამ ქვეყნიდან წასასვლელად .ალბათ ახლა პირნათელი წარდგებოდა ღმერთთან...აბა, ისე უფალი დიმიკოს არ გაწირავდა...“- აღნიშნავს მოკლული ბიჭის მეგობარი.

რაც შეეხება გურამ ფოცხიშვილს, მას კრიმინალური წარსული აქვს. გურიაში დარწმუნებულები არიან, რომ სწორედ მისი მკვლელობა იყო დაგეგმილი.

„ფოცხიშვილების ოჯახს აქ ყველა იცნობს, გურამ ფოცხვერაშვილის ბაბუა კანონიერი ქურდი იყო, მამაც მის კვალს გაჰყვა. დავით ფოცხიშვილს (მოკლულის მამა) ე.წ. შავი სამყაროს წარმომადგენლებთან პრობლემები 90 -იან წლებში შეექმნა, როცა ოზურგეთში თბილისიდან ჩასულ „კანონიერ ქურდთან“ მოუვიდა უთანხმოება, საქმე ერთ-ერთის დაჭრამდე მივიდა.

გურამიც ხშირად იყო გაუგებრობების მონაწილე. ამბობენ „ავტორიტრეტები“ ჰყავდა გადაკიდებულიო, თუ არ ვცდები ამ დაპირიპირების გამო ერთი პერიოდი დაჭერილიც კი იყო. ციხეშიც მაკრატლით დაუჭრიათ“- აღნიშნავს ადგილობრივი.

ფოცხიშვილის გვარი 2006 წელს მომხდარ კრიმინალურ ფაქტს უკავშირდება. 11 წლის წინ, მან პოლიციას ცეცხლი გაუხსნა, რის გამოც გაასამართლეს კიდეც. ხელისუფლების ცვლილების შემდეგ, კი ბრალდებული შეიწყალეს”- განუცხადეს „ნიუპოსტს“ ადგილობრივებმა.

შინაგან საქმეთა სამინისტროს ინფორმაციით, ბოლო დროის ერთ-ერთ სისხლიან მკვლელობაზე გამოძიება სისხლის სამართლის კოდექსის 109-ე მუხლით დაიწყო, რაც დამამძიმებელ გარემოებაში განზრახ მკვლელობას გულისხმობს.

"ნიუპოსტის" ინფორმაციით ბრალდებულები დაკავებულები არ არიან.

ფოტოზე: მოკლული დიმა ომოლჩენკო