საქართველოს ძიუდოისტთა ეროვნულ გუნდში მსოფლიოსა და ევროპის სამგზის ჩემპიონი ავთანდილ ჭრიკიშვილი ბრუნდება. სამკურნალო რეაბილიტაციის კურსის დასრულების შემდეგ საქართველოს ნაკრების ლიდერი 81კგ-ის ნაცვლად 90 კგ. წონით კატეგორიაში იჭიდავებს. ინფორმაციას ამის შესახებ საზოგადოებრივი მაუწყებელი ავრცელებს.

ავთანდილ ჭრიკიშვილმა ბოლოს, 2017 წლის 26 თებერვალს დიუსელდორფის გრან-პრიზე იასპარეზა და 1/16 ფინალურ ეტაპს ესპანეთის სახელით მოჭიდავე ნიკოლოზ შერაზადიშვილთან წაგების შემდეგ გამოეთიშა.

ირაკლი ცირეკიძის გუნდი 22-23 ივლისს ბელარუსის დედაქალაქ მინსკის ტატამზე გადახალისებული შემადგენლობით გამოვა, თუმცა მინსკში საქართველოს ნაკრები სრული შემადგენლობით გაემგზავრა, სადაც შეჯიბრის დასრულების შემდეგ ერთობლივი საწვრთნელ მოსამზადებელი შეკრება ჩატარდება.