"უზრდელურად დავწერე, თუმცა ბოდიში მოსახდელი არ მაქვს"- კორკოტას აღიარება

საზოგადოება - 12:14, 19 Jul, 2017

16829

"ქართული მარშის" ორგანიზატორი, გია კორკოტაშვილი, რომელიც თათია დოლიძეს გაუპატიურებით დაემუქრა, აცხადებს, რომ ბოდიშის მოსახდელი არაფერი გაუკეთებია.

მისი თქმით, სოციალურ ქსელში ორი მეგობარი "თუნდაც უზრდელურად" მესამეს განიხილავდა.

„ორ ადამიანს შორის პრივატლაპარაკი მიდიოდა, შეფასება. მე შეიძლება თემაში იქ დავწერე, რომ მოსაკლავია კიდევ კარგი არ დამიწერია, ცოტა უზრდელურად დავწერე ეს, მაგრამ ორ ადამიანს შორის მესამეს განსჯა რომ მიდის, ჩვენ რა სლენგი გვაქვს ერთმანეთში... იქ დამიწერეს, რომ გაუპატიურებით დაემუქრნენ, გაუპატიურებით დამუქრება არის, როცა ადამიანს პირადად დაურეკავ და ეტყვი, რომ მე შენ გიზამ ამას და ამას... მე ორ ადამიანს შორის რა სლენგია უზრდელურიც თუ არის და თუ მე გინებით გამოვხატავ ამას, ვისი რა საქმეა, ერთი გამაგებინეთ?! მაგაზე არც ბოდიში მაქვს მოსახდელი და არც არაფერი. ის სიტყვა, რაც მაქვს ნახმარი, თქვენ მართლა ტვინიდან დაავადებულებო, მართლა იმაში რომ გამიყვანეთ, ეს პედოფილი არისო. მე არსად არაფერი საბოდიშო არ მაქვს, ორ მეგობარს შორის რა ტექსტით იყო მოხსენიებული მესამე ადამიანი“, - განაცხადა კორკოტაშვილმა "ობიექტივის" ეთერში.

ცნობისთვის, ე.წ. ქართველთა მარშის ორგანიზატორები გაეროში საქართველოს ყოფილ ახალგაზრდა ელჩს თათია დოლიძეს მის მიერ დაწერილი სტატუსის გამო 4 დღის წინ დაემუქრნენ. საზოგადოების მწვავე კრიტიკის შემდეგ, Facebook პოსტი წაშლილია. თუმცა მედიამ ე.წ. სქრინების შენახვა შეძლო, სადაც ნათლად ჩანს, რომ მარშის ორგანიზატორები, პატრიოტთა ალიანსის წევრი კონსტანტინე მორგოშია, გია კორკოტაშვილი, მიხეილ ამისულაშვილი და სხვები თათია დოლიძეს გაუპატიურებით ემუქრებიან.

აღსანიშნავია, რომ სკანდალის შემდეგ, აღნიშნული პირები აცხადებდნენ, რომ მათ სოციალური ქსელი გაუტეხეს და კომენტარები მათ არ დაუწერიათ.

დოლიძის მიმართ სოციალური ქსელით გავრცელებული სავარაუდო მუქარის ფაქტზე შსს-მ გამოძიება სსკ-ს 151-ე მუხლით დაიწყო რაც მუქარას გულისხმობს.

ახალგაზრდამ პოლიციას ჩვენება უკვე მისცა. უცნობია დაიკითხნენ თუ არა "ქართული მარშის" წევრები.