19 ივლისს, 20:00 საათზე თბილისში, დავით აღმაშენებლის გამზირზე, მარჯანიშვილზე კიდევ ერთი აქციის გამართვაა დაგეგმილი. აქცია - მოვრეცხოთ მარჯანიშვილის მოედანი, სავარაუდოდ, ქსენოფობიური, ე.წ. ქართველთა მარშის საპასუხო აქციაა.

აქციის ორგანიზატორი დავით აბზიანიძეა, დღეს კი სოციალურ ქსელში ვრცელდება ინფორმაცია, რომ დათო აბზიანიძეს ექაუნთი გაუტეხეს და მის მიერ შექმნილი ივენთი "#მოვრეცხოთმარჯანიშვილისმოედანი" წაშალეს.

ფეისბუკზე აქციის ივენთი ნამდვილად არ იძებნება.

შეგახსენებთ, გასულ კვირას, პარასკევს, 14 ივლისს მარჯანიშვილზე, ქსენოფობიური, ე.წ. ქართველთა მარში გაიმართა.

აღნიშნული აქციის შემდეგ განჩდა იდეა აქციისა - #მოვრეცხოთმარჯანიშვილისმოედანი!

"მოგეხსენებათ, თუ როგორ არის ჩვენი ქალაქი დაბინძურებული ათასი პარაზიტით. გასული კვირის მოვლენები გვიჩვენებს, რომ არაფერი გვეშველება, სანამ ჩვენვე არ ავიღებთ ხელში ინიციატივას!

შემოგვიერთდით და თან იქონიეთ წყლის ბოთლები, სარეცხი საპონი და სურვილის შემთხვევაში - აქანდაზი.

ვიკრიბებით მარჯანიშვილის მეტროსთან “- აღნიშნული იყო აქციის ორგანიზატორების მიმართვაში და აქციაზე მისვლის მსურველებს მოუწოდებენ თან იქონიონ სხვადასხვა ქვეყნის დროშა.