რუსთავის კულტურის პარკში მოქანდაკეთა სიმპოზიუმის ფარგლებში შექმნილი პირველი სკულპტურა განთავსდა

საზოგადოება - 15:52, 18 Jul, 2017

2388

რუსთავის კულტურისა და დასვენების პარკში, ტბის პირას, მოქანდაკეთა სიმპოზიუმის ფარგლებში შექმნილი პირველი სკულპტურა განთავსდა. ნამუშევარი, რომელიც რკინაშია შესრულებული, „ადამიან ღამურას“ განასახიერებს და მისი ავტორი ესპანელი მოქანდაკე ამანსიო გონსალესია. იგი აღნიშნული სკულპტურის შექმნაზე დაახლოებით 10 დღის განმავლობაში მუშაობდა. მისი სიმაღლე 6 მეტრს, სიგანე კი 3 მეტრს შეადგენს. ქანდაკების დადგმის პროცესს დღეს რუსთავის მერი დავით ჯიქია, ესპანელ სკულპტორ ამანსიო გონსალესთან ერთად დაესწრო.

რუსთავში მოქანდაკეთა საერთაშორისო სიმპოზიუმი ერთი კვირის წინ გაიხსნა. მასში მონაწილეობას რვა ქართველი და სამი უცხოელი – ესპანელი, ფრანგი და ეგვიპტელი მოქანდაკე იღებს. ისინი რუსთავის კულტურისა და დასვენების პარკში, სპეციალურად გამოყოფილ სივრცეში, ერთი თვის განმავლობაში იმუშავებენ. მათ მიერ შექმნილი სკულპტურული ნამუშევრები კი პარკის ტერიტორიასა და ქალაქის ქუჩებში განთავსდება.

მოქანდაკეთა საერთაშორისო სიმპოზიუმი, რომელიც რუსთავის მერიის ,,სახელოვნებო გაერთიანებათა ცენტრის’’ ორგანიზებით იმართება, 11 აგვისტოს საზეიმოდ დაიხურება.