„არა ოკუპაციას“,- სოფელ ბერშუეთთან ამ ლოზუნგით აქცია მიმდინარეობს, რომელშიც მონაწილეობას საზოგადოების წევრები, მედიისა და პოლიტიკური პარტიების წარმომადგენლები იღებენ. „ქრონიკა პლიუსის“ მთავარი რედაქტორის ელისო კილაძის განცხადებით, ისინი აპროტესტებენ მცოცავ ოკუპაციას, რათა მსოფლიოს უთხრან, რომ რუსეთი არის ოკუპანტი:

„სახელმწიფო არის ძალიან პასიური ოკუპაციასთან დაკავშრებით, მათგან არ ისმის მკვეთრი პოზიცია, რომ გავაპროტესტოთ საზღვრების გადმოწევა. ჩვენ სიმბოლურად დავდგით ბანერი, რომელზეც მკაფიოდაა აღნიშნული, რომ საქართველოს საზღვარი რეალურად 101 კილომეტრშია. მე აქციაზე დღეს ჩემს შვილებთან ერთად მოვედი, მათ შორის არის ჩემი უფროსი შვილი, რომლიც სასამართლოდან გუშინ გათავისუფლდა. ვაპროტესტებთ მცოცავ ოკუპაციას, რათა მსოფლიოს ვუთხრათ, რუსეთის არის ოკუპანტი, დღეს ჩვენ ყველამ ერთად უნდა ვუთხრათ რუსეთს არა“, - განუცხადა ელისო კილაძემ „ნიუპოსტს“.

ჟურნალისტი ასევე ეხმაურება თბილისში დღეს დაგეგმილ „ქართველთა მარშს“.

„მე მინდა ქართველთა მარშის მონაწილეებს ვუთხრა, დღეს რეალური პრობლემა არის აქ, ჩვენ უნდა გავაპროტესტოთ მცოცავი ოკუპაცია და ჩვენ არ ვაპროტესტებთ ემიგრანტების არსებობას ჩვენს ქვეყანაში, რადგან ჩვენი ქვეყანა არის სტუმართმოყვარე, რომელიც არის კეთილგანწყობილი უცხოელების მიმართ“, - დასძენს კილაძე.