მუსიკალური ცენტრის შენობის უსაფრთხოება - ვახტანგ კახიძე კულტურის სამინისტროსა და მერიას მიმართავს

საზოგადოება - 15:34, 13 Jul, 2017

1916

გუშინ აღმაშენებლის გამზირზე მდებარე ჯანსუღ კახიძის მუსიკალური ცენტრის ფასადის ნაწილი ჩამოინგრა. შემთხვევის შედეგად მრავლობითი დაზიანებები მიიღო ახალგაზრდა ქალმა, რომელიც მკურნალობას ამ დროისთვის საავადმყოფოში გადის. გამოძიება სისხლის სამართლის კოდექსის 240-ე მუხლის პირველი ნაწილით (უსაფრთხოების წესის დარღვევის მუხლით )მიმდინარეობს.

ჯანსუღ კახიძის მუსიკალური ცენტრი დახმარებისთვის კულტურის სამინისტროს მიმართავს. მათი თქმით სარეაბილიტაციო სამუშაოების ჩასატარებლად საჭირო თანხა არ აქვთ. შენობას შიდა რესტავრაცია 2003 -2010 წლებში „ქართუ ფონდის“ დაფინანსებით ჩაუტარდა. ჯანსუღ კახიძის სახელობის თბილისის მუსიკალურ-კულტურული ცენტის სამხატვრო ხელმძღვანელის ვახტანგ კახიძის თქმით, გარე ფასადი მხოლოდ კოსმეტიკურად გარემონტდა.

„მივმართავ კულტურის სამინნისტროსაც და მერიასაც, რომ რაც შეიძლება სწრაფად გამოიყოს კომისია, რომელიც შეაფასებს ამ მდგომარეობას და რა შეიძლება იყოს გამომწვევი მიზეზი. რაც მთავარია რისი გაკეთება შეიძლება, რომ უსაფრთხოება იყოს დაცული. გადმოცემული გვაქვს შენობა და ვეწევით ჩვენ შემოქმედებით მუშაობას აქ., რის გამოც გვაფინანსებს კულტურის სამინისტრო, ეს არის კულტურის სამინისტრის მიერ დაფუძნებული საჯარო სამართლის იურიდიული პირი“- განაცხადა ვახტანგ კახიძემ.