"ბახალას" მხარდასაჭერად დღეს თბილისში აქცია გაიმართება

საზოგადოება - 12:11, 13 Jul, 2017

2086

დღეს, 13 ივლისს, 19:00 საათზე, დედაენის ბაღში, მსახიობ გიორგი გიორგანაშვილის მხარდასაჭერად და უსამართლო ნარკოპოლიტიკის გასაპროტესტებლად აქცია გაიმართება. აქციის ორგანიზატორი „თეთრი ხმაურის მოძრაობაა“

„ვიკრიბებით ერთად ბახალასთვის, მისი სიმართლისთვის და უსამართლო ნარკოპოლიტიკის ყველა მსხვერპლისთვის.

ვიცით, რომ დაკავების დღიდან მაღალია საზოგადოებრივი ინტერესი მისი საქმის მიმართ. შეზღუდული კომუნიკაციის პირობებში (მას დღემდე არ აძლევენ დარეკვის უფლებას) არ გვეძლეოდა საქმის დეტალებისა და ბახალას პოზიციის გაცნობის შესაძლებლობა. ვრცლად საქმის დეტალებზე ხვალ პრესკონფერენციაზე ვისაუბრებთ.

გიორგი პრინციპულ უარს აცხადებს საპროცესო შეთანხმებაზე და აპირებს ბოლომდე იბრძოლოს საკუთარი სიმართლისთვის. ვანახოთ ბახალას, რომ ის ამ ბრძოლაში მარტო არ არის!“- ნათქვამია აქციის ორგანიზატორთა მიმართვაში.

გიორგი გიორგანაშვილი ნარკოდანაშაულისთვის 5 თვის წინ დააკავეს, მას ბრალი განსაკუთრებით დიდი ოდენობით ბუპრენორფინის პირადი მოხმარების მიზნით ფლობისათვის წაუყენეს, სასჯელის ზომად კი 8-დან 20 წლამდე ან უვადო პატიმრობა ემუქრება.

როგორც გიორგი გიორგანაშვილის ადვოკატები და მეგობრები აცხადებენ საქმეში ბახალას უდანაშაულობის დამადასტურებელი მრავალი არსებითი დარღვევა იკვეთება. „ბოლო პერიოდის “ჩადების” გახმაურებული ფაქტების მსგავსად მის საქმეშიც მხოლოდ პოლიციელები არიან მოწმეებად. დაკავების მომენტში ის გადაიყვანეს და გაჩხრიკეს ბნელ, უკამერო ადგილას. დაჟინებული მოთხოვნის მიუხედავად კი ჩხრეკას ნეიტრალური პირი არ დაასწრეს. რაც ყველაზე საგანგაშოა, დაკავების დღიდან მას გარე სამყაროსთან კონტაქტის ყველა საშუალება აეკრძალა. ფიზიკური ტყვეობის გარდა ის 5 თვეა ინფორმაციულ ტყვეობაშიც იმყოფება. დღემდე, კომუნიკაციის ერთადერთი გზა მისი ადვოკატები არიან. გიორგი გამოძიების მხრიდან მასზე პერმანენტულ ზეწოლაზე მიუთითებს.“- ნათქვამია ბახალას მხარდამჭერთა განცხადებაში.