მორიგი ყაჩაღობა სამეგრელოში - ბოროტმოქმედები მოქალაქეს სასტიკად გაუსწორდნენ

კრიმინალი - 11:06, 07 Jul, 2017

5112

ყაჩაღობა მოხდა ხობის რაიონ სოფელ ხიბულაში. კვირკვაიების ოჯახში 2 ნიღბიანი შეიჭრა და შუახნის მამაკაცს სასტიკად გაუსწრდა. გიმზერ კვირკვია "ნიუპოსტთან" აცხადებს, რომ ბოროტმოქმედებმა ის ეზოში დაიჭირეს და სახლში იარაღის მუქარით შეიყვანეს.

ნიღბიანები გარკვეულ თანხას ითხოვდნენ. როგორც დაზარალებული ჰყვება, ოჯახმა წინა დღეს 1 ტონამდე თხილი გაყიდა, რომელიც ავადმყოფი შვილის მკურნალობისთვის კლინიკას იმავე დღეს გადაურიცხა.

კვირკვაიები აღნიშნავენ, რომ ყაჩაღები სწორედ ამ თანხას ითხოვდნენ, მას შემდეგ კი რაც გადახდის ქვითარი ვერ წარმოადგინეს, მამაკაცს დაახლოებით 20 წუთის განმავლობაში ურტყამდნენ. გიმზერ კვირკვიას დაზიანებები თავის არეში აღენიშნება.

საბოლოო ჯამში ოჯახიდან 200 ლარამდე თანხა და ძვირფასეულობა წაიღეს. სოფელში კრიმინალი შემთხვევებზე საუბრობენ. მათი თქმით, კვირკვაიების დაყაჩაღება რიგით მეოთხე შემთხვევაა. დაზარალებულების მეზობელი ჯანსუღ ჯიშკარიანი "ნიუპოსტთან" აცხადებს, რომ მიმდინარე წლის აპრილში 5 ნიღბიანი მასაც დაესხა თავს. ბოროტმოქმედები ჯიშკარიანისგან იმ თანხას ითხოვდნენ, რომელიც მათი ინფორმაციით ოჯახმა მიწის ნაკვეთის გაყიდვის შედეგად მიიღო.

ხიბულას კიდევ ერთი მკვიდრი, ხაბურძანია აღნიშნავს, რომ 10 აპრილს მასაც გაუსწორდნენ ფიზიკურად და სახლიდან ოქროულობა და 300 ლარამდე თანხა წაიღეს.

მოსახლეობა სამართალდამცავებს მეტი აქტიურობისკენ მოუწოდებს. მათი თქმით, სოფელში გარკვეული კრიმინალური დაჯგუფება არსებობს, რომლებიც სავარაუდოდ ადგილობრივები არიან.

რაც შეეხება კვირკვაიების დაყაჩაღების ფაქტს, შს სამინისტროში "ნიუპოსტს" უთხრეს, რომ ბრალდებულების დასაკავებლად სამძებრო ღონისძიებები აქტიურად მიმდინარეობს.

გამოძიება სისხლის სამართლის კოდექსის 179-ე მუხლით დაიწყო, რაც ყაჩაღობას გულისხმობს.