მუხთარლის მეუღლე მასზე განხორციელებულ თვალთვალზე საუბრობს და საქმის გამოძიებას ითხოვს

საზოგადოება - 10:04, 07 Jul, 2017

1778

აზერბაიჯანელი ჟურნალისტის აფგან მუხთარლის მეუღლე აცხადებს, რომ მას და მის მეგობარს უთვალთვალებენ.

ლეილა მუსტაფაევას თქმით, მასზე თვალთვალი შესაძლოა აფგან მუხთარლის გატაცებას უკავშირდებოდეს.

"ერთი კვირის წინ თავისუფლების მოედანზე ერთ-ერთ კაფეში აფგან მუხთარლის მეგობართან ერთად ვიმყოფებოდი. რამდენიმე წუთით ჩემი ადგილი დავტოვე და დაბრუნებისას აღმოვაჩინე, რომ ჩემს სკამზე კომპიუტერის ჩანთა იდო. უცნობი მამაკაცი მომიახლოვდა და მანიშნა ,რომ ჩანთა მისი იყო, შემდეგ კი სასწრაფოდ დატოვა კაფე. ჩვენ ეს საეჭვოდ მოგვეჩვენა და მომხდარის შესახებ პოლიციას შევატყობინეთ. ამ შემთხვევის გამოძიების მოთხოვნით პოლიციასა და პროკურატურას ოფიციალურად მივმართე. თუმცა მიმაჩნია, რომ მომხდარი აფგან მუხთარლის საქმესთანაა დაკავშირებული და ეს სათანადოდ არ იქნება გამოძიებული," - განაცხადა ლეილა მუსტაფაევამ.

აფგან მუხთარლის მეგობარი, რომელიც ლეილა მუსტაფაევასთან ერთად იმყოფებოდა, არ გამორიცხავს, რომ ჩანთაში მოსასმენი მოწყობილობა იყო

"ამ შემთხვევის სწრაფ გამოძიებას ველოდებოდით, თუმცა ისიც ვიცით, რომ როდესაც საქართველოში რაიმე ქმედებაში აზერბაიჯანული მხარეა გარეული, საქმის მიმართ დამოკიდებულება განსხვავებულლია," - აღნიშნა დაშგინ აღალარლიმ.