„ნავთობის საერთაშორისო კონსორციუმი“ XIM და XIN სალიცენზიო ბლოკებზე სამუშაოების წარმოებას იწყებს

ბიზნესი & ეკონომიკა - 21:39, 18 Jun, 2013

950

სალიცენზიო ბლოკებზე მოპოვებული პროდუქციის წილობრივი განაწილების ხელშეკრულებებს კონსორციუმსა და საქართველოს სახელმწიფოს შორის ხელშეკრულება მიმდინარე წლის მაისში გაფორმდა. თუმცა, "ნავთობის საერთაშორისო კონსორციუმმა" ბლოკებზე ნავთობის ძებნა-ძიებისა და მოპოვების უფლება 2012 წლის 5 ივნისს ,,ბუნებრივი რესურსების სააგენტოს" მიერ ნავთობისა და გაზის რესურსებით სარგებლობის გენერალური ლიცენზიის მოსაპოვებლად გამართულ ღია საერთაშორისო ტენდერში მოიპოვა.

ხელმოწერის ბონუსი ორივე ბლოკზე სულ 1 მლნ აშშ დოლარს შეადგენს. უახლოესი ოთხი წლის განმავლობაში, თითოეულ ბლოკზე კონსორციუმი კომპლექსური გეოფიზიკური კვლევების ჩატარებას გეგმავს. მათ შორის, ორ და სამგანზომილებიანი სესისმური სამუშაოების განხორციელებას. ხელშეკრულებით, ინვესტორი ვალდებულია ორივე ობიექტზე 25 მლნ აშშ დოლარის ინვესტიცია ჩადოს.

XIM სალიცენზიო ბლოკის ტერიტორია ადმინისტრაციულად მიეკუთვნება თბილისის, მცხეთა-მთიანეთის და თეთრი წყაროს, ხოლო XIN ბლოკის ტერიტორია _ თბილისის, მცხეთა-მთიანეთის და საგარეჯოს რაიონებს.

კონსორციუმის დამფუძნებლები არიან: ქართული კომპანია სს "ნორიოს ნავთობის კომპანია", ბრიტანეთის ვირჯინიის კუნძულებზე რეგისტრირებული "ჯორჯია ოილ ენდ გეზ ლიმიტედი", "ჯორჯია ოილ ენდ გეზ თრიალეთი ლიმიტედი" და ,,ჯორჯია ოილ ენდ გეზ ნორიო ლიმიტედი".

2011 წლიდან "ჯორჯია იოლ ენდ გეზ ლიმიტედი" ნავთობისა და გაზის ოპერაციებს სამ სალიცენზიო ფართობზე ახორციელებს. ასევე, სს ,,ნორიოს ნავთობის კომპანიასთან" ერთად ფლობს ნავთობისა და გაზის რესურსებით სარგებლობის გენერალურ ლიცენზიას XIA სალიცენზიო ბლოკზე.

2012 წლის განმავლობაში ,,ჯორჯია იოლ ენდ გეზ ლიმიტედმა" 7 201 040 აშშ დოლარის ინვესტიცია განახორციელა, 2013 წელს დაახლოებით 7 მლნ აშშ დოლარის ინვესტირებას გეგმავს.