დაუდგება თუ არა პატრიარქი დაკავებულ დეკანოზს თავდებში - რა პასუხი მიიღო მამალაძის ოჯახმა საპატრიარქოში

საზოგადოება - 12:41, 23 Jun, 2017

3581

საქართველოს საპატრიარქომ, ილია მეორისა და დაკავებული დეკანოზის გიორგი მამალაძის ოჯახის წევრების შეხვედრის აუდიოჩანაწერი გამოაქვეყნა. აუდიოჩანაწერის მიხედვით დეკანოზ გიორგი მამალაძის ძმა პატრიარქს სთხოვს დაკავებულ სასულიერო პირს თავდებში ჩაუდგეს, თუმცა მის ამ თხოვნაზე კონკრეტული პასუხი თორნიკე მამალაძეს პატრიარქისგან არ მიუღია:

„თუ შესაძლებელი იქნება, ეს არანაირი კანონდარღვევა არ არის, შესაძლებელია თქვენი თავდებობით მამაოს გარეთ გამოსვლა და თქვენ როგორც გადაწყვეტთ, იქნებ ამ დროის მონაკვეთში, სანამ სასამართლო სხდომები მიმდინარეობს, მონასტერში წავიდეს მამაო, ან თქვენი მეთვალყურეობის ქვეშ აქ მოვიდეს. მისთვის ციხე არის დამთრგუნველი, ეს სიმართლე დამტკიცდება აუცილებლად, უბრალოდ ამ ყველაფერს თვეები სჭირდება. ეს ოჯახისთვისაც ძალიან ძნელი გადასატანია.“- მიმართავს თორნიკე მამალაძე პატრიარქს. აუდიოჩანაწერში პატრიარქი მამალაძეს არ პასუხობს, დეკანოზის ძმას მამა დავით ჭინჭარაული პასუხობს.

„თორნიკე, ჩვენ ყველანარიად ვეცდებით, უწმინდესიც ეცდება, რომ ეს გაკეთდეს, თუ შესაძლებელია.“- აცხადებს მამა დავითი.