16 ივნისიდან პეკინის გამზირი გადაიკეტება

საზოგადოება - 16:55, 12 Jun, 2017

25015

16 ივნისიდან პეკინის გამზირის სრული რეაბილიტაცია იწყება. აღნიშნულ საკითხთან დაკავშირებით, თბილისის მერიაში დედაქალაქის მერის ხელმძღვანელობით სამუშაო თათბირი გაიმართა. შეხვედრას თბილისის მერიის კეთილმოწყობისა და ტრანსპორტის სამსახურების ხელმძღვანელები, საკომუნიკაციო კომპანიების, ასევე სამუშაოს მწარმოებელი კომპანიის ხელმძღვანელები ესწრებოდნენ.

როგორც თბილისის მერმა შეხვედრაზე განაცხადა, რეაბილიტაცია მოიცავს როგორც მიწისქვეშა კომუნიკაციების სრულ გამოცვლას, ასევე გზის საფარის და ტროტუარების მოწესრიგებას.

"როგორც თქვენთვის ცნობილია, 16 ივნისს პეკინის გამზირის რეაბილიტაცია იწყება. რეაბილიტაცია მოიცავს როგორც მიწისქვეშა კომუნიკაციების სრულ გამოცვლას, ასევე გზის საფარის და ტროტუარების მოწესრიგებას. მნიშვნელოვანია ის, რომ სამუშაოს მასშტაბებიდან და მოცულობიდან გამომდინარე, ჩვენ გვიწევს პეკინის გამზირის ცალკეული მონაკვეთების დაკეტვა, შესაბამისად მოსახლეობა რაიონული გამგეობის მიერ წინასწარ იქნება გაფრთხილებული, რათა თავიდან ავიცილოთ გადაადგილების შეზღუდვასთან დაკავშირებული დისკომფორტი. მაქსიმალურად ვეცდებით, რომ სამუშაოები სწრაფ ტემპში, 24 საათიან რეჟიმში წარიმართოს, რათა სექტემბერში, ვიდრე მოსახლეობა ქალაქში დაბრუნდება, ყველა ძირითადი სამუშაო იყოს დასრულებული და გადაადგილება იყოს თავისუფალი. ამიტომაც ჩვენ აქ გვესწრება როგორც სამუშაოს შემსრულებელი კომპანია, ასევე ის კომპანიები, რომლებიც კომუნიკაციაზე არიან პასუხისმგებლები. სამი მთავარი ამოცანა გვექნება: პირველი - რაც შეიძლება, ინტენსიურ რეჟიმში ვიმუშავებთ და 24 საათიანი სამუშაო გრაფიკი გვექნება. მეორე - ეს იქნება დისკომფორტის მინიმუმამდე დაყვანა, რათა ჩვენი თანამოქალაქეების ის ნაწილი, რომელიც ზაფხულის განმავლობაში ქალაქში რჩებიან, მათთვის გადაადგილებასთან დაკავშირებული დისკომფორტი იყოს მინიმუმამდე დაყვანილი და მესამე - სამუშაოების მაღალი ხარისხით შესრულება. სწორედ ამიტომ გადავწყვიტეთ, რომ საკომუნიკაციო კომპანიებთან ერთად, ჯერ კომუნიკაციები გამოვცვალოთ, შემდეგ მოვაწესრიგოთ გზის საფარი და ტროტუარები. ქუჩების პერიოდულ დაკეტვასთან და მოძრაობის შეზღუდვასთან დაკავშირებით ჩვენ მჭიდროდ ვთანამშრომლობთ საპატრულო პოლიციასთან, შესაბამისად, საზოგადოებას მივაწვდით ინფორმაციას, კონკრეტულად, დღეების მიხედვით რომელ ქუჩებზე დაწესდება შეზღუდვები. რაიონული გამგეობა აფრთხილებს მოსახლეობას, იქ არსებული კომერციული ფართების მესაკუთრეებს, რათა წინასწარ ჰქონდეთ ინფორმაცია. ვფიქრობ, რომ ჩვენი ქალაქისთვის არის ძალიან მნიშვნელოვანი პროექტი და ის მცირე დისკომფორტი, რაც დაკავშირებული იქნება შეზღუდვებთან, არაფერია იმასთან შედარებით, რა სიკეთესაც ქალაქი პეკინის გამზირის სრული რეაბილიტაციით მიიღებს", - განაცხადა დავით ნარმანიამ.

საგზაო ინფრასტრუქტურა პეკინის ქუჩაზე 60 წელია არ შეკეთებულა.

საკომუნიკაციო ქსელის აღდგენა - გამოცვლას, კომპანია GWP განახორციელებს. სრული რეაბილიტაცია ჩაუტარდება წყალსადენის ორ კმ-იან მაგისტრალურ ქსელს. წყალსადენის გამანაწილებელი ქსელების სამ კმ-იანი სიგრძის ძველი მილსადენები სრულად შეიცვლება ახლით. ასევე, წყალსადენის მაგისტრალური ქსელების ინფრასტრუქტურული ელემენტები სრულად განახლდება და მოეწყობა ევროსტანდარტის ჩამკეტ-მარეგულირებელი ურდულები. წყალმომარაგების და წყალარინების ქსელების სათვალთვალო ჭებზე ახალი, ევროსტანდარტის, ჰერმეტული და ბრენდირებული თავსახურები დამონტაჟდება. სრული რეაბილიტაცია ჩაუტარდება 400 მეტრი სიგრძის წყალარინების ქსელის მიწისქვეშა გვირაბულ კოლექტორს. სარეაბილიტაციო სამუშაოებს მსოფლიოს წამყვანი, გერმანული კომპანიების ექსპერტები განახორციელებენ.

გარდა ამისა, მოეწყობა 600 მეტრი სიგრძის ახალი სანიაღვრე ქსელი, ასევე ახალი საკონტროლო ჭები და ცხაურები, სულ 20 ერთეული. პროექტის ფარგლებში მოხდება ასფალტის ძველი საფარის დემონტაჟი, როგორც სავალ ნაწილზე, ასევე ტროტუარებზე; დაიგება ასფალტის ახალი, ორფენიანი საფარი.

სამუშაოების მოცულობიდან გამომდინარე, რეაბილიტაცია ინტენსიურ რეჟიმში წარიმართება. სამუშაოები სამი თვის განმავლობაში გაგრძელდება და გასტანს მიმდინარე წლის ივნისიდან სექტემბრის ჩათვლით, ახალი სასწავლო წლის დაწყებამდე. პროექტს თბილისის მერიის კონტრაქტორი კომპანია „ბლექ სი გრუპი“ განახორციელებს.

სარეაბილიტაციო სამუშაოების წარმოების დროს პეკინის ქუჩაზე საავტომობილო მიმოსვლა ეტაპობრივად, სხვადასხვა მონაკვეთებზე შეიზღუდება.