როგორც ცნობილია, ამერიკის შეერთებულ შტატებში ბრალდება წარუდგინეს მაფიოზურ დაჯგუფებას, რომელსაც წარმოშობით ქართველი რაჟდენ შულაია ედგა სათავეში. როგორც ამერიკული მედია წერს, ეს ყველაზე დიდი დაჯგუფებაა, რომელიც ოდესმე გამომჟღავნებულა აშშ-ს სამართალდამცველების მიერ. პრესა ამ დაჯგუფებას "რუსულ კრიმინალურ სინდიკატს" უწოდებს და აცხადებს, რომ მასში ყოფილი სსრკ-ს სხვადასხვა რესპუბლიკების წარმომადგენლები შედიან, მათ შორის, რუსები, უკრაინელები, თუმცა უმრავლესობა ქართველია.
ნიუ-იორკის სამხრეთის ოლქის პროკურატურა რაჟდენ შულაიას "კანონიერ ქურდს" უწოდებს.
კრიმინალურ დაჯგუფებას ბრალი ედება შეკვეთილი მკვლელობების, რეკეტის, ყაჩაღობისა და თაღლითობის ორგანიზებაში. ასევე, კრიმინალები აკონტროლებდნენ იატაკქვეშა სატამაშო სახლებს და კლუბებს, ვაჭრობდნენ მოპარული სიგარეტებითა და სხვა საქონლით და სხვა მრავალ დანაშაულში.
40 წლის რაჟდენ შულაიას გარდა საქმეში ფიგურირებს ზურაბ ჯანაშვილის, აკაკი უბილავას, ჰამლეტ უგულავას, ნიკოლოზ ჯიქიასა და სხვა კრიმინალების გვარები. სულ საქმეში 27 გვარია მოხსენიებული, მათგან 24 დაპატიმრებულია. ნიკოლოზ ჯიქიას და კიდევ რამდენიმე კრიმინალს, რომელიც შეკვეთილი მკვლელობების ორგანიზებაში ედებათ ბრალი სამუდამო პატიმრობა ელის.
შულაიას დაჯგუფება ძირითადად ნიუ-იორკში იყო დისლოცირებული, თუმცა, მოქმედებდა ასევე ნიუ-ჯერსიში, პენსილვანიაში, ფლორიდაში, და ნევადაში. ასევე რამდენიმე "ოპერაცია" აშშ-ს ფარგლებს გარეთაც აქვს შესრულებული.
მაფიური დაჯგუფების წევრები მჭიდრო კავშირში იყვნენ რუსეთში, საქართველოსა და უკრაინაში მოქმედ "კოლეგებთან" და ხშირად დიდი ოდენობით თანხებსაც ურიცხავდნენ მათ.
FBI-ი აცხადებს, რომ ის კვლავ აგრძელებს ამ საქმის გამოძიებას და დაჯგუფების სხვა წევრების გამოვლენას.
მასალის გამოყენების პირობები