დავით ნარმანია კიევში ბიზნეს კონფერენციაში "უკრანა და პარტნიორები" მიიღებს მონაწილეობას

ბიზნესი & ეკონომიკა - 13:38, 14 Jun, 2013

668

საქართველოს რეგიონული განვითარებისა და ინფრასტრუქტურის მინისტრი დავით ნარმანია და გაერთიანებული წყალმომარაგების კომპანიის დირექტორი არჩილ ცაბუტაშვილი უკრაინის დედაქალაქ კიევში გაემგზავრნენ, სადაც მონაწილეობას მიიღებენ პირველ საერთაშორისო ბიზნეს-კონფერენციაში - "უკრაინა და პარტნიორები".
აღნიშნული ბიზნეს-კონფერენციის მიზანია ძალების გაერთიანება ურთიერთსასარგებლო თანამშრომლობისა და გლობალური ეკონომიკური კრიზისის უარყოფითი ზეგავლენის დაძლევის გზების ძიებისათვის. კონფერენციაში მონაწილეობას მიიღებენ უკრაინის პრემიერ-მინისტრი მიკოლა აზაროვი, უკრაინის მინისტრთა კაბინეტის სხვა წარმომადგენლები, უკრაინის პარტნიორი ქვეყნების მინისტრები და დიპლომატები, ასევე, ლიდერი საინვესტიციო კომპანიების, ფინანსური და ბიზნეს სტრუქტურებისა და ბანკების ხელმძღვანელები.
კონფერენცია მოიცავს არაერთ სადისკუსიო პანელს, პრეზენტაციასა და მრგვალ მაგიდას, ასევე, პლენარულ სხდომებსა და კულტურულ ღონისძიებებს.
დავით ნარმანია მონაწილეობას მიიღებს სადისკუსიო პანელში სახელწოდებით: "უკრაინის სატრანზიტო პოტენციალის რეალიზაცია და ინფრასტრუქტურის განვითარების საინვესტიციო და ბიზნეს შესაძლებლობები". აღნიშნულ დისკუსიაში ასევე მონაწილეობას მიიღებენ უკრაინის ვიცე-პრემიერი ალექსანდრ ვილკული, უკრაინის ინფრასტრუქტურის მინისტრი ვლადიმირ კოზაკი და სხვა ოფიციალური პირები. ასევე, დაგეგმილია დავით ნარმანიას მონაწილეობა სადიკუსიო პანელში - "დსთ-ს ქვეყნების ეკონომიკური ინტეგრაცია და საბაჟო კავშირების განვითარება: უკრაინული ბიზნესის პერსპექტივები", რომელიც ამავე კონფერენციის ფარგლებში ჩატარდება და რომელშიც მონაწილეობას მიიღებენ უკრაინის ვიცე-პრემიერი იური ბოიკო, უკრაინის ეკონომიკური განვითარებისა და ვაჭრობის მინისტრი იგორ პრასოლოვი და სხვა ოფიციალური პირები.