"ასეთი დიდი წაგებით მხოლოდ კარგი გამოცდილება შემიძლია მივიღო"- ბასილაშვილი ნადალთან დამარცხებას ეხმაურება

სპორტი - 16:39, 03 Jun, 2017

4869

ქართველი ჩოგბურთელი ნიკოლოზ ბასილაშვილი, რომელიც გუშინ როლან გაროსის 1/16 ფინალში მსოფლიოს მეოთხე ჩოგანთან, ესპანელ რაფაელ ნადალთან დამარცხდა, სოციალურ ქსელში პოსტს აქვეყნებს. ბასილაშვილი აღნიშნავს, რომ ამ შეხვედრამ კარგი გამოცდილება შესძინა და აჩვენა, თუ რაზე აქვს უფრო მეტი სამუშაო. ქართველი ჩოგბურთელი გუკშემატკივრობისთვის ყველას მადლობას უხდის, ხოლო რაფაელ ნადალს გამარჯვებას და როლანდ გაროსის მე-10 ტიტულის მოპოვებას უსურვებს.

„მოგესალმებით, პირველ რიგში მინდა დიდი მადლობა გადაგიხადოთ გულშემატკივრობისთვის და გვერდში დგომისთვის. ასევე, მსურს კიდევ ერთხელ მივულოცო რაფას დღევანდელი გამარჯვება და მომავალ თამაშებში წარმატებები ვუსურვო, ის ნამდვილად იმსახურებს როლანდ გაროსის მე-10 ტიტულს.

დღეს რთული შეხვედრა მქონდა. ჩემი მოლოდინი რა თქმა უნდა დიდი იყო, მაგრამ ამ მომენტში მხოლოდ ამის მიღწევა შემეძლო. რაფას თამაშის სტილმა არ მომცა შანსი მეთამაშა ჩემი თამაში. ამ შეხვედრამ კარგად დამანახა რაზე მაქვს გაცილებით მეტი სამუშაო, რომ განვითარდე. მე აუცილებლად მჭირდება ასეთი მატჩები ასეთ ტურნირებზე. ეს ანგარიში არ არის ჩემთვის მისაღები, მაგრამ სამომავლოდ დიდ მოტივაციას მაძლევს.

ასეთი შანსები, როგორიც რაფასთან როლანდ გაროსის ცენტრალურ კორტზე თამაშია, არ მოდის ადვილად, მაგრამ მე ეს გამოვიმუშავე და ეს მაჩვენებს, რომ სწორი განვითარებით მივდივარ. ასეთი დიდი წაგებით მხოლოდ კარგი გამოცდილება შემიძლია მივიღო.“- წერს ნიკოლოზ ბასილაშვილი.