იუვენტუსი VS რეალი - ევროსაკლუბო სეზონის დასკვნითი ბრძოლა დღეს გაიმართება

სპორტი - 12:36, 03 Jun, 2017

3568

დღეს 3 ივნისს კარდიფის "მილენიუმზე" UEFA-ს ჩემპიონთა ლიგის დასკვნითი მატჩი გაიმართება. ფინალში ერთმანეთს ორი გამორჩეული გუნდი, ტურინის„იუვენტუსი“ და მადრიდის „რეალი“ დაუპირისპირდება. ბევრისთვის დღევანდელი შეხვედრა კრიშტიანუ რონალდუსა და ჯიჯი ბუფონის დაპირისპირებადაა მონათლული.

ლეგენდარულ მეკარეს ჯანლუიჯი ბუფონს 2003 და 2015 წლებში ვერცხლის მედალი ერგო, ახლა კი მესამედ ეძლევა შანსი მოიგოს ნანატრი ტიტული, ბუფონს ასევე შანსი აქვს გახდეს ყველაზე ასაკოვანი ფეხბურთელი, ვისაც ჩემპიონთა ლიგა მოუგია.

თუ „რეალი“ მოიგებს, ესპანური გუნდი ჩემპიონთა ლიგის არსებობის ისტორიაში გახდება პირველი გუნდი, რომელმაც ტურნირის მოგება ზედიზედ ორჯერ შეძლო.

იუვენტუსსა და რეალს ურთიერთდაპირისპირების საინტერესო ისტორია აქვს:

„იუვენტუსი“ და „რეალი“ ერთმანეთს 18-ჯერ შეხვდა. თითოეულმა გუნდმა რვა გამარჯვება მოიპოვა და შეხვედრა ორჯერ ფრედ დაასრულა. გატანილი გოლების რაოდენობაც თითქმის ერთნაირია — 21:18 იტალიელთა სასარგებლოდ. „რეალს“ მიმდინარე გათამაშებაში ყველაზე მეტი გოლი აქვს გატანილი, ხოლო „იუვენტუსს“ ყველაზე ნაკლები გაშვებული.

სავარაუდო შემადგენლობები

იუვენტუსი (3-4-2-1): ბუფონი - ბარძალი, ბონუჩი, კიელინი - დანი ალვეში, ხედირა, პიანიჩი, ალექს სანდრო - დიბალა, მანჯუკიჩი - იგუაინი

რეალი (4-3-1-2): კეილორ ნავასი - კარვახალი, სერხიო რამოსი, ვარანი, მარსელო - მოდრიჩი, კაზემირო, კროოსი - ისკო - რონალდო, ბენზემა

მსაჯი: ფელიქს ბრიხი (გერმანია)

პირველად ისტორიაში, ჩემპიონთა ლიგის ფინალი გადახურულ არენაზე გაიმართება. უელსის საფეხბურთო ასოციაცია მიიჩნევს, რომ „რეალი“-„იუვენტუსის“ მატჩის დროს უსაფრთხოება ამ ფორმით უფრო მეტად იქნება დაცული. ორგანიზატორები ე.წ. დრონიდან ტერორისტული შეტევებისგან იზღვევენ თავს.