გაიზრდება თუ არა გაზის ტარიფი? - სემეკი გადაწყვეტილებას ივნისის შუა რიცხვებში მიიღებს

საზოგადოება - 10:33, 02 Jun, 2017

2071

ენერგეტიკისა და წყალმომარაგების მარეგულირებელი ეროვნული კომისიის თავმჯდომარე აცხადებს, რომ ბუნებრივი აირის ახალ ტარიფებთან დაკავშირებით სემეკის გადაწყვეტილება ივნისის შუა რიცხვებში იქნება მიღებული.

ირინა მილორავა არ პასუხობს კითხვას გაიზრდება თუ არა გაზის ტარიფი.

“კომისიის აპარატმა თითქმის დაასრულა მუშაობა ბუნებრივი გაზის ტარიფებზე, რაც წარმოდგენილი იყო 4 კომპანიის მიერ - ეს არის განაწილების 3 ლიცენზიანტი კომპანია „ყაზტრანსგაზი", „საქორგაზი" და „სოკარ ჯორჯია გაზი", ასევე ტრანსპორტირების ლიცენზიანტის - „გაზის ტრანსპორტირების კომპანიის“ მიერ წარმოდგენლი სატარიფო განაცხადი. ჩვენ ველოდებით, რომ უახლოესი 2 კვირის განმავლობაში დავნიშნავთ საჯარო სხდომებს... არის კიდევ რაღაც დეტალები დასაზუსტებელი, მათ შორის, საკმაოდ მნიშვნელოვანი კომპონენტების ნაწილში. ამდენად, საჯარო სხდომებზე გვექნება უკვე სრულყოფილი, ამომწურავი, დასაბუთებული ინფორმაცია ყველა იმ კომპონენტზე, რომლის გათვალისწინებაც მოხდება ტარიფში", - განაცხადა მილორავამ.

დღეს გაირკვა, რომ ბუნებრივი გაზის ტარიფებთან დაკავშირებით კომისიის გადაწყვეტილება იქნება ივნისის შუა რიცხვებში, თუმცა ძალაში შესვლის თარიღი სემეკის გადაწყვეტილებით განისაზღვრება.