თსუ-ში ტიერი ბერიშვილის წიგნის პრეზენტაცია გაიმართა

საზოგადოება - 11:26, 27 May, 2017

1795

ივანე ჯავახიშვილის სახელობის თბილისის სახელმწიფო უნივერსიტეტის ბიბლიოთეკაში ქართველ ხალხთა მეგობრობისა და კულტურის ფრანგული ასოციაციის პრეზიდენტის, ლევილის ქართული მამულის მართვის საბჭოს წევრის ტიერი ბერიშვილის წიგნის „ქართული სოციალ-დემოკრატია 1880-1953: ორენოვანი წიგნი (ქართულ-ფრანგული) მკითხველს აცნობს ქართული სოციალ-დემოკრატიის ისტორიას, პოლიტიკური ბრძოლის გზასა და პოლიტიკურ ხედვებს. ძირითადი ორიენტირების“ პრეზენტაცია გაიმართა.

„როდესაც თსუ-ში შეიქმნა პირველი რესპუბლიკის შემსწავლელი ცენტრი, გადავწყვიტე რომ დამებრუნებინა პარტიის არქივები, ასევე მამია ბერიშვილის პირადი არქივი. ეს ყველაფერი ჩამოვიტანეთ უნივერსიტეტის ბიბლიოთეკაში. ამ ყველაფრის ბაზაზე შეიქმნა ეს წიგნიც, რომელიც მოიცავს პერიოდს 1880 წლიდან 1953 წლამდე. აქ არის წარმოდგენილი რამდენიმე საკვანძო საკითხი, რომელიც დღემდე არ არის გამოკვლეული. მაგალითად, 1924 წლის აჯანყება, აგრარული რეფორმა, რომელიც გატარდა პირველი რესპუბლიკის დროს და საზღვარზე ფარულად გადმომსვლელების ისტორია 1921 წლის შემდგომ პერიოდში. წიგნში წარმოდგენილია სხვადასხვა ისტორიკოსების დოკუმენტები, რომლებიც მუშაობდნენ ქართული სოციალ-დემოკრატიის ისტორიაზე, ის საბუთები, რომელიც მხოლოდ ევროპაში იბეჭდებოდა და საქართველოში ისინი უცნობია,“- აღნიშნა ტიერი ბერიშვილმა.

„ტიერი ბერიშვილი ერთ-ერთი გამორჩეული მოღვაწეა, რომელიც ცხოვრობს უცხოეთში , მაგრამ ძალიან დიდ საქმეს აკეთებს საქართველოსთვის. მისი დიდი დახმარებით გაიხსნა თსუ-ს ბიბლიოთეკაში დემოკრატიული რესპუბლიკის შემსწავლელი ცენტრი. დღეს უკვე გვაქვს ჩვენი თანამშრომლობის ერთ-ერთი შედეგი - ტიერიმ შექმნა საინტერესო სამეცნიერო მონოგრაფია, რომლითაც შეისწავლა სოციალ-დემოკრატიის ისტორია საქართველოში მე-19 საუკუნის ბოლოდან მე-20 საუკუნის 60-იან წლებამდე. ვფიქრობ, ეს არის საინეტრესო სამეცნიერო გამოკვლევა, რომლითაც დაინტერესდებიან საქართველოს ისტორიით, პოლიტიკური პარტიის ისტორიით დაინტერესებული პოლიტიკოსები, მკვლევრები სტუდენტები,“- განაცხადა თსუ ბიბლიოთეკის ხელმძღვანელმა ზურაბ გაიპარაშვილმა.

ღონისძიებას თსუ სტუდენტები, პროფესორები მოწვეული სტუდენტები დაესწრნენ. წიგნის ქართული გამოცემა მოამზადა თბილისის სახელმწიფო უნივერსიტეტის ბიბლიოთეკამ. ტექსტი ფრანგული ენიდან ქართულად თარგმნა ქეთევან ქუსიკაშვილმა. წიგნი თბილისის სახელმწიფო უნივერსიტეტის გამომცემლობამ გამოსცა.