დღეს თბილისის წიგნის საერთაშორისო ფესტივალი იხსნება

საზოგადოება - 10:00, 25 May, 2017

1835

საქართველოს წიგნის გამომცემელთა და გამავრცელებელთა ასოციაციის ორგანიზებით 25-28 მაისს „ექსპო ჯორჯიას“ მე-11 პავილიონში თბილისის წიგნის მე-19 საერთაშორისო ფესტივალი გაიმართება. ფესტივალის ფინანსური მხარდამჭერები არიან: საქართველოს კულტურისა და ძეგლთა დაცვის სამინისტრო, საქართველოს პრეზიდენტის სარეზერვო ფონდი და ქალაქ თბილისის მერია.

თბილისის წიგნის მე-19 საერთაშორისო ფესტივალი გამორჩეული იქნება ღონისძიებების მრავალფეროვნებით, მონაწილე საგამომცემლო სახლების, ავტორების, გამავრცელებლების, საელჩოების, უნივერსიტეტების, საერთაშორისო ფონდებისა და სხვადასხვა პროფილის ორგანიზაციების სიმრავლით. აღსანიშნავია ის ფაქტი, რომ წელს ფესტივალის ფარგლებში 100-მდე ღონისძიებაა ჩანიშნული.

ფესტივალზე დარეგისტრირებულია 60-მდე მონაწილე. მონაწილეები მრავალფეროვანი ღონისძიებებით დატვირთულ ფესტივალს პირდებიან წიგნის მოყვარულებს. დაგეგმილია ლიტერატურული ღონისძიებები, ახალი წიგნების პრეზენტაციები, შეხვედრები ავტორებთან, დისკუსიები, საჯარო კითხვა, პროფესიული სემინარები, საუკეთესო ბლოგერების გამოვლენა, კოსტუმირებული კარნავალი და, რა თქმა უნდა, სპეციალური სტუმრის წარდგენა. წელს პირველად საერთაშორისო წიგნის ბაზრობების სტანდარტების შესაბამისად, თბილისის ფესტივალს ჰყავს ფოკუს ქვეყანა - ნორგვეგია, რომელიც წარმოდგენილი იქნება მსოფლიოს ერთ-ერთი ყველაზე გავლენიანი ლიტერატურული ფონდით NORLA და ოთხი ნორვეგიელი მწერლით: როსკვა კორიცინსკი, ნილს ჰენრიკ სმითი, სიმენ ეკერნი და სიგბიორნ მოსტიუ ფესტივალის სპეციალური სტუმრები იქნებიან.

თბილისის წიგნის საერთაშორისო ფესტივალი არ დაარღვევს ტრადიციას და პატარა მკითხველებს სპეციალურ კუთხეს მოუწყობს, რომელიც დატვირთული იქნება სხვადასხვა გასართობი, ინტელექტუალური საბავშო ღონისძიებებით, ასევე პატარებისთვის ფესტივალის სიმბოლურ დახურვაზე იგეგმება ბუშტების გაშვება მე-11 პავილიონის ეზოდან.

თბილისის წიგნის საერთაშორისო ფესტივალი საქართველოს წიგნის გამომცემელთა და გამავრცელებელთა ასოციაციის ორგანიზებით 1997 წლიდან ყოველწლიურად ტარდება და მიეკუთვნება იმ მცირერიცხოვან კულტურულ ღონისძიებებს, რომელთა მიმართ საზოგადოების ინტერესი და ჩართულობა ყოველწლიურად მატულობს. ფესტივალი სტაბილურად განაგრძობს განვითარებასა და დამთვალიერებლებისთვის სიახლეების შეთავაზებას.