დედის თხოვნით, ბავშვის ფოტო და ვიდეო გადაცემიდან ამოიჭრება

დედის თხოვნით, ბავშვის ფოტო და ვიდეო გადაცემიდან ამოიჭრება - გადაცემა "ბავშვების დრო"

საზოგადოება - 14:56, 24 May, 2017

18127

ინტერნეტგადაცემა "ბავშვების დრო" თავის Facebook გვერდზე განცხადებას ავრცელებს.
"გუშინ, ჩვენი გადაცემის გვერდზე გავრცელდა ფოტო - ანონსი, სადაც მივუთითეთ,რომ გადაცემაში ისაუბრებდა დედა - შვილზე, რომელიც მისი ვარაუდით ონანიზმით არის დაკავებული. დედამ მისივე სურვილით გადმოგვცა ვიდეო მასალა და დაგვთანხმდა,რომ გადაცემაში გამოგვეყენებინა. ფოტოს გავრცელებას, ძალიან დიდი და ამასთანავე უარყოფითი რეაქცია მოჰყვა საზოგადოებაში. ჩვენ გვესმის, რომ მსგავს თემებზე საუბარიც კი, ჯერ კიდევ უარყოფითად აღიქმება. ჩვენმა მაყურებელმა, როგორც ჩანს ჩათვალა, რომ გავრცელდებოდა ბავშვის ინტიმური დეტალები, რაც არღვევს ბავშვის უფლებებს. ბუნებრივია, ეს ჩვენი სურვილი არ ყოფილა და არც დედის გადაღებულ ვიდეომასალაში ყოფილა მსგავი რამ. ეს არის გადაცემა, რომელიც მხოლოდ ინფორმაციული ხასიათისაა და მიზნად ისახავს,ბავშვებთან დაკავშირებით მეტი ინფორმაცია მიაწოდოს საზოგადოებას, დედებს. სამწუხაროა, რომ საზოგადოება არ დაელოდა გადაცემის გასვლას და მხოლოდ ფოტოს საფუძველზე მოახდინა რეაგირება. ძალიან ვწუხვართ მომხდარი გაუგებრობის გამო. დედის თხოვნით და ჩვენი გადაწყვეტილებით გადაცემა გავა ბავშვის კადრების გარეშე."- აღნიშნულია განცხადებაში.

შეგახსნებთ, ინტერნეტგადაცემა „ბავშვების დროს“ ანონსი სკანდალური აღმოჩნდა. გადაცემას ერთ-ერთმა მშობელმა მიაწოდა ვიდეომასალა სადაც როგორც დედა ამბობს მისი შვილი სავარაუდოდ ონანიზმით არის დაკავებული.

„დედის მიერ გადაღებული ვიდეომასალა, სადაც ბავშვი როგორც დედა ამბობს სავარაუდოდ ონანიზმით არის დაკავებული, დედის თანხმობით მოხვდა ჩვენს გადაცემაში. სულ მალე, ჩვენს გადაცემაში ნახეთ დედა, რომელიც საკუთარი შვილის ისტორიას მოგიყვებათ.“- ნათქვამია გადაცემის ანონსში, რომელიც ფეისბუკზე გავრცელდა.

აღნიშნული გადაცემა უფლებადამცველების და საზოგადოების მხრიდან კრიტიკის სამიზნე გახდა. მათი თქმით, მშობელიც და გადაცემის შემოქმედებითი ჯგუფიც ბავშვის პირადი ცხოვრების ხელშეუხებლობის უფლებას არღვევს.