ანი მურადელი 15 წელიწადზე მეტია, რაც ზაქარია ფალიაშვილის სახელობის ოპერისა და ბალეტის თეატრის წამყვანი სოლისტია.
„ნიუპოსტთან“ საუბრისას მურადელის კოლეგები, ერთხმად აღიარებენ ახალგაზრდას ნიჭს, თუმცა იმასაც ამბობენ, რომ ბოლო პერიოდში ანის დეპრესია ჰქონდა და ამას ლოგიკური ახსნაც აქვს.
მოცეკვავე რამდენიმე წლის წინ დაშორდა მეუღლეს, ცნობილი ქორეოგრაფის, ნუკრი მაღალაშვილის ვაჟს. გავრცელებული ინფორმაციით, მურადელი ალკოჰოლდამოკიდებული გახდა, რის დაძლევაში პრიმაბალერინას ნინო ანანიაშვილი დასთან ერთად ეხმარებოდა. ანანიაშვილი ანის გვერდოთ იყო მაშინაც, როცა მან ფეხზე ტრამვა მიიღო და რამდენიმე ოპერაციის გაკეთება დასჭირდა.
მკვლელობაში ბრალდებული საკმაოდ წარმატებულ და ცნობილ ოჯახში გაიზარდა - მამა ლევან მურადელი მუსიკოსი გახლდათ, ხოლო დედა კი უნივერსიტეტში ლექციებს ატარებდა.
არსებული ინფორმაციით, მურადელმა დედა თავში ბლაგვი საგნის ჩარტყმის შედეგად მოკლა.
მოცეკვავემ მკვლელობამდე, რამდენიმე დღით ადრე, 13-14 მაისს, საბალეტო დადგმაში „გორდა“ აღმოსავლური ცეკვა შეასრულა.
მკვლელობის დეტალები მურადელის კოლეგებისთვის უცნობია, მათი თქმით, ხელოვანს დედასთან პრობლემები ჰქონდა, თუმცა კონფლიქტი თუ ასე ღრმა იყო, ეს ანისთვის არავის შეუტყვია.
„მეუღლეს დაშორდა, ტრავმა მიიღო, ვეღარ ცეკვავდა, რამდენიმე ოპერაციის გაკეთება დასჭირდა. სამი წელი გოგო ვერ ცეკვავდა და ამის გამო საშინელი დეპრესია ჰქონდა. დასიც და ქალბატონი ნინო ანანიაშვილი მაქსიმალურად ხელს უწყობდა, რომ ეცეკვა და იცეკვა კიდეც. 13 -14 მაისს „გორდაში“ სოლო პარტია იცეკვა. სხვა რაღაცები, ოჯახურ პირობებზე და ასე შემდეგ არამგონია ჩვენთან ვინმემ იცოდეს“- განუცხადა „ნიუპოსტს“ ფალიაშვილის სახელობის ოპერისა და ბალეტის თეატრის წარმომადგენელმა, რომელმაც სახელის გამხელა არ ისურვა.
რესპონდენტი ანი მურადელს უკონფლიქტო ადამიანად ახასიათებს.
„არავისთან კონფლიქტი არ ჰქონია, თავისი საქმის პროფესიონალია, ვინც ერთხელ მაინც ნახავს მის ცეკვას ანი არასდროს დაავიწყდება, ძალიან მენანება ეს არაჩვეულებრივი მოცეკვავე ციხისთვის, შოკში ვართ. რაც შეეხება ალკოჰოლდამოკიდებულებას, ითქვა ესეც, თუმცა პირადად მე ის მთვრალი არ მინახავს, ამ კედლების მიღმა ვინ რას აკეთებს ეს მისი პირადი ცხოვრებაა“- განაცხადა მურადელის კოლეგამ.
მასალის გამოყენების პირობები