შეფასებისა და გამოცდების ეროვნულ ცენტრში აცხადებენ, რომ ქართული ენისა და ლიტერატურის გამოცდაზე მე-12 კლასის მოსწავლეთა 97% -ზე მეტმა ზღვარი წარმატებით გადალახა.

წელს საგნებში მე-12 კლასელებისათვის ბარიერი 5-დან 10 ბალიან შკალას შეადგენს დამოსწავლეებმა გამოცდის ჩასაბარებლად სულ მცირე 5.5 ქულა უნდა მიიღონ.

შეფასების ათვლა იწყება 5 ქულიდან და ზღვრის გადასალახად მოსწავლემ დაახლოებით 15 კითხვას უნდა გასცეს სწორი პასუხი.

მე-12 კლასის მოსწავლეებისთვის გამოსაშვები გამოცდები ქართული ენისა და ლიტერატურის გამოცდით საქართველოს 1600-მდე სკოლაში გუშინ დაიწყო.

გამოცდისათვის 48 ათასზე მეტი მოსწავლეა დარეგისტრირებული. დამამთავრებელი კლასის მოსწავლეები გამოცდას ოთხ საგანში ქართულ ენასა და ლიტერატურაში, ისტორიაში, უცხო ენასა და მათემატიკაში ჩააბარებენ.

მოსწავლეები დღეს, უცხოურ ენას ჩააბარებენ.

გამოსაშვები გამოცდები კომპიუტერზე ადაპტირებული ტესტირების ქართული მოდელით (Gcat) ტარდება. მოსწავლის შესაძლებლობებზე მორგებული ტესტირების ქართული ვერსია – ალგორითმი და პროგრამული უზრუნველყოფა შეფასებისა და გამოცდების ეროვნულ ცენტრში შეიქმნა. სისტემა კონკრეტულ კითხვაზე გაცემული პასუხის მიხედვით ურჩევს მოსწავლეს მომდევნო კითხვას, სანამ მის ცოდნასა და შესაძლებლობებს არ დაადგენს.